Tags-Dard

jahān-e-dard meñ insāniyat ke naate se
koī bayān kare merī dāstāñ hogī

tumhāre dard kī daulat uThā.e jaate haiñ
chale haiñ aise ki jaise parā.e jaate haiñ

kahīñ gul hai kahīñ bulbul kahīñ baaġh
kahīñ dard o kahīñ darmāñ huā hai

sham-e-tamannā pichhle pahar tak dard kā aañsū ban hī ga.ī
shaam kā taarā kaise Duubā sub.h kā taarā jaane hai

kyā dard-e-dil muharrik-e-ḳhidmat nahīñ rahā
jannat Thahar ga.ī hai binā-e-savāb kyā

qadam qadam dukh dard ke saa.e shahr hue vīrāne bhī
kis ne des ke phūloñ par ab hijr kī raakh uḌaa.ī hai

pattā pattā shāḳh se TuuTe darvāzoñ pe vahshat sī
yaaro prem kathā meñ kis ne dard kī taan milā.ī hai

ik dard kā maarā mire andar hī chhupā hai
aur us ko kahīñ dard ke maare nahīñ milte

ik shagufta dard ik sho.aloñ meñ bujhtī chāñdnī
ajnabī shahroñ se laayā huuñ yahī sauġhāt maiñ

gā rahā huuñ ḳhāmushī meñ dard ke naġhmāt maiñ
ban gayā ik sāhil-e-vīrāñ kī tanhā raat maiñ

haath meñ haath liye saarā jahāñ saath liye
tohfa-e-dard liye pyaar kī sauġhāt liye

husūl-e-dard-o-ġham kī koshishoñ meñ gar kamī hotī
surūr-o-kaif kī lazzat kahāñ mujh ko milī hotī

ḳhush-lahnoñ ke liye gulshan bhī kunj-e-qafas ban jaa.e to
jabr ke gun gaate haiñ yā naġhmoñ meñ dard samote haiñ

kis kis dard ko apnā.eñ aur kis kis zaḳhm ko sahlā.eñ
dekhtī āñkhoñ qadam qadam par ka.ī havādis hote haiñ

ab bhī mazāq-e-dard se merī shaboñ meñ hai gudāz
mere laboñ pe aaj bhī naġhma-e-husn-e-yār hai

dard-e-dil chhoḌ jā.iye so kahāñ
apnī bāhar to yahāñ guzar hī nahīñ

ik dūsrī botal aane tak ye durd-e-tah-e-sāġhar hī sahī
aur tishna-e-mai betāb na ho saaqī ko nadāmat hotī hai

hausle se sahārnā ġham ko
dard ko be-vaqār mat karnā

mujhe fitrat navā par pai-ba-pai majbūr kartī hai
abhī mahfil meñ hai shāyad koī dard-āshnā baaqī