Tags-Dard

rihā kar de qafas kī qaid se ghāyal parinde ko
kisī ke dard ko is dil meñ kitne saal pālegā

mash.al-e-dard phir ek baar jalā lī jaa.e
jashn ho jaa.e zarā dhuum machā lī jaa.e

rutba-e-dard ko jab apnā hunar pahuñchegā
ham-nashīñ zabt-e-suḳhan kā bhī asar pahuñchegā

tujhe siine se lagā luuñ tujhe dil meñ rakh luuñ
dard kī chhāñv meñ zaḳhmoñ kī amaañ meñ aa jā

shauq ban ban ke mire dil meñ haiñ aate jaate
dard ban ban ke haiñ pahlū meñ samāte jaate

aaj ruktī hai marīz-e-ġham-e-ulfat ko shifā
chārāgar dard bhī jā.egā to jaate jaate

sukūñ milegā unheñ kis ke āstāne par
vo ahl-e-dard jinheñ terā aasrā na milā

mujhe chhoḌ de mere haal par tirā kyā bharosa hai chāragar
ye tirī navāzish-e-muḳhtasar merā dard aur baḌhā na de

tire darīche se hai duur merā darvāza
agar tū dard hai merā to dil ke baab meñ aa

maiñ huuñ paikān-e-dard ai 'ḳhurshīd'
aur ik yaad kī kamān meñ huuñ

gumbad-e-sher meñ jo gūñjtī hai
maiñ usī dard kī azaan meñ huuñ

koī dard ho to davā karūñ na bane davā to duā karūñ
use kyā kahūñ use kyā karūñ ki maiñ un ke dil se utar gayā

chhalak paḌeñ na kahīñ ashk merī āñkhoñ se
kisī ke dard-e-mohabbat kī ho na rusvā.ī

marīz-e-ishq ko hai dard-e-dil davā ke liye
rahī ġhizā so hai ḳhūn-e-jigar ġhizā ke liye

shola-e-dard jo pahlū meñ lapak uTThegā
dil kī dīvār pe har naqsh damak uTThegā

jahāñ-shanās o ḳhud-āgāh kar diyā mujh ko
mire shu.ūr ne vo dard-e-āshnā.ī diyā

tīr-e-nazar ne zulm ko ehsāñ banā diyā
tarkīb-e-dil ne dard ko darmāñ banā diyā

aah vo sho.ala hai jo jī ko bujhā ke uTThe
dard vo fitna hai jo dil ko biThā ke uTThe

dard-o-ġham ko bhī hai nasība shart
ye bhī qismat sivā nahīñ miltā

rut badalte hī dil meñ na.ī Tiis paidā huī
zahr-ālūd mausam meñ ik dard paltā rahā