Tags-Dard

dil se āñkhoñ se makīnoñ se makāñ se guzre
dard phir dard hai jab chāhe jahāñ se guzre

us ko sāyoñ ke ta.āqub meñ likhā thā rahnā
dard āñgan meñ ghanā ek shajar chāhtā thā

ik dard sā pahlū meñ machaltā hai sar-e-shām
jab chāñd jharoke meñ nikaltā hai sar-e-shām

raat ke āḳhirī aañsū kī tarah Duub gayā
ḳhvāb-añgez nigāheñ vo lab-e-dard-fareb

tū bhī taqdīr nahīñ dard bhī pā.inda nahīñ
tujh se vābasta vo ik ahd vo paimān-e-vafā

dard hī dard huuñ fariyād nahīñ huuñ shāyad
zer-e-mizhgāñ tapish-e-āh ke pighlā.e hue

shab-e-āḳhir falak par TimTimā kar Dūbte taare
maiñ apne saath terā dard bhī mahsūs kartā huuñ

apne dukh kā ghūñT galā aur yaar ke aañsū oḌh
un āñkhoñ ke dard se baḌh kar kyā hogā nuqsān

jab pursish-e-hāl vo farmāte haiñ jāniye kyā ho jaatā hai
kuchh yuuñ bhī zabāñ nahīñ khultī kuchh dard sivā ho jaatā hai

dard itnā thā ki us raat dil-e-vahshī ne
har rag-e-jāñ se ulajhnā chāhā

dil jo rotā hai use gaate hue nikle 'nadīm'
log is dard-e-mohabbat ko adab kahte haiñ

vo bhī lahrā ke har ik dard sunā kartī hai
qaid kā vāqi.a zanjīr se jab kahte haiñ

maiñ ne to kī thī dard-e-musalsal kī aarzū
tum ko gumāñ huā ki davā māñgtā huuñ maiñ

aa.ī jo terī yaad to āñkheñ baras paḌīñ
is vaqt tere dard kā dil par nuzūl hai

kisī ne us ko mohabbat meñ dard baḳhshā thā
vo bevafā.ī mujhe moḌ dene aayā thā

ronā hañsnā hañsnā ronā aadat hai
ham ko bhī kuchh dard chhupāne aate haiñ

'abr' maiñ kyā kah sakūñgā un se hāl-e-dard-e-dil
jo zabāñ se lafz niklegā fuġhāñ ho jā.egā

na rotā zār-zār aisā na kartā shor-o-shar itnā
ilāhī kyā karūñ dard-e-jigar itnā jigar itnā

sukūñ kī talab mujh ko hargiz nahīñ hai
bas ik dard kā silsila dījiyegā

haath phailā.ūñ maiñ īsā-nafasoñ ke aage
dard pahlū meñ mire hai magar itnā bhī nahīñ