Tags-Dard

ab ye bhī nahīñ Thiik ki har dard miTā deñ
kuchh dard kaleje se lagāne ke liye haiñ

ye dukh-dard kī barkhā bande den hai tere daatā kī
shukr-e-ne.amat bhī kartā jā dāman bhī phailātā jā

kabhī kabhī tire dil tak pahuñch gayā mirā dard
kabhī huā to yahī ishq meñ gunāh huā

ham se dard ke māroñ kī muḳhtārī kyā majbūrī kyā
jiinā aur na marnā lekin umr basar karte jaanā

zaḳhm khaa.e hue zamāna huā
dard ab tak nayā sā lagtā hai

dard se yuuñ najāt kab hogī
vaqt Thahrā huā sā lagtā hai

dil meñ dard āñkhoñ meñ āshob-e-jigar meñ sozish
ishq kyā dete haiñ ik rog lagā dete haiñ

hamāre dard kā tūfāñ kahāñ kahāñ na uThā
ye shor aap jahāñ chāhte vahāñ sunte

mujh meñ hai kuchh dard bachā so zinda huuñ
chāragar ne bol diyā so zinda huuñ

zindagī dard meñ Duubī huī lai hai 'rāhī'
aise aalam meñ kise yaad rahe pyaar kī baat

hijr kī do karvaToñ ne kar diyā qissa tamām
dard-e-dil āġhāz thā dard-e-jigar anjām thā

dard ġham rañj aaheñ ḳhāmoshī
aur paayā hai kyā mohabbat se

dam-e-āḳhir tū mire paas bhalā aa be-dard
terī furqat meñ koī dam meñ hai ruḳhsat merī

raat bhīgī hai to chheḌā hai tire dard kā saaz
chāñd niklā hai to chupke se jagāyā hai tujhe

matā-e-dard ma.āl-e-hayāt hai shāyad
dil-e-shikasta mirī kā.enāt hai shāyad

zaḳhmoñ meñ jab dard kī kaskan baḌhtī hai
naalā lab par aa ke duā ho jaatā hai

siine meñ jab dard koī bo jaatā hai
ro lete haiñ jī halkā ho jaatā hai

pāband-e-ġham-e-ulfat hī rahe go dard-e-dahindāñ aur sahī
ashkoñ kī ravānī tham na sakī āñkhoñ ke the armāñ aur sahī

kis ko sunā.eñ kaun sunegā
dard bharā apnā qissa hai

ḳhulūs dard mohabbat vafā ravādārī
ye naam ham ne kisī āshnā ke rakkhe haiñ