Tags-Dariya

kyuuñ ham pe ilzām hai maulā sāzish kā
kab the ham dariyā tūfānī yā allāh

lab-e-dariyā mujhe lahroñ se yūñhī chahal karne do
ki ab dil ko isī ik shuġhl-e-be-ma.anī meñ rāhat hai

har taraf raat kā phailā huā dariyā dekhūñ
kis taraf jā.ūñ kahāñ Thahrūñ ki chehrā dekhūñ

is dil pe guzartī hai kaifiyat-e-rañgā-rañg
tūfāñ sā umaD aa.e dariyā sā utar jaa.e

qatre haiñ ye sab jis ke vo dariyā hai alī
pinhāñ hai kabhī to gaah paidā hai alī

shamīm-e-gulshan nasīm-e-sahrā shuā-e-ḳhurshīd mauj-e-dariyā
har ek garm-e-safar hai in meñ merā koī ham-safar nahīñ hai

khel maujoñ kā ḳhatarnāk sahī kyā maiñ is khel se Dar jā.ūñgā
phir koī lahar pukāregī phir maiñ dariyā meñ utar jā.ūñgā

ye hastī nīstī sab mauj-ḳhezī hai mohabbat kī
na ham qatra samajhte haiñ na ham dariyā samajhte haiñ

dariyā meñ Duub jaave ki yā chaah meñ paḌe
ai ishq par na koī tirī raah meñ paḌe

chhā ga.ī ek musībat kī ghaTā chaar taraf
khule bāloñ jo vo dariyā se nahā kar nikle

dekhā use to aañkh se aañsū nikal paḌe
dariyā agarche ḳhushk thā paanī tahoñ meñ thā

ḳhvāboñ ke sāhiloñ kī taraf dekhtā hai kaun
chaḌhtā huā jo dard kā dariyā dikhā.ī de

ġham huuñ jo apne aap meñ ristā dikhā.ī de
dariyā meñ Duub kar hī kinārā dikhā.ī de

hue mar ke ham jo rusvā hue kyuuñ na ġharq-e-dariyā
na kabhī janāza uThtā na kahīñ mazār hotā

us ne to ham ko hī 'ziyā' dariyā meñ Dubonā chāhā thā
lekin the jo saath hamāre vo bhī saare Duub ga.e

dariyā ke vo paar hue haiñ chāhat se jo duur rahe
pyaar kī kashtī khene vaale sab bechāre Duub ga.e

is ko khel kaheñ qismat kā yā ham dariyā kī sāzish
tūfānoñ se bach nikle to aa ke kināre Duub ga.e

dariyā meñ ġharq dekhne vaale bhī ho ga.e
mujh ko magar havāla-e-tūfāñ na kar sake

mauj-e-dariyā ko piyeñ kyā ġham-e-ḳhamyāza kareñ
rag-e-afshurda-e-sahrā meñ lahū taaza kareñ

log to paar utar jaate haiñ
dariyā dekhtā rah jaatā hai