Tags-Dariya

ro dūñgā to ashk nahīñ āñkhoñ se ret bahegī
ḳhuun kahāñ kuchh sūkhe dariyā haiñ sahrā bhar mujh meñ

ek din dariyā makānoñ meñ ghusā
aur dīvāreñ uThā kar le gayā

pāniyoñ meñ khel kuchh aisā bhī honā chāhiye thā
biich dariyā meñ koī kashtī Dubonā chāhiye thā

kabhī ham-rañg-e-zamīñ hai kabhī ham-dosh-e-falak
kohsāroñ se uchhaltā huā dariyā dekho

yuuñ shor kā dariyā biphrā hai chiḌiyoñ ne chahaknā chhoḌ diyā
ḳhatre ke nishān se nīche ab utre sailāb to achchhā ho

dariyā kī vus.atoñ se jo ḳhā.if rahe vo log
samjhe nahīñ ki ek kināra bhañvar meñ hai

mujh ko shikva hai ki dil kā ḳhuun qātil ne kiyā
dil ye kahtā hai mujhe qatre se dariyā kar diyā

badaltā rahtā huuñ har lamha apne ḳhad-o-ḳhāl
kahīñ guhar kahīñ dariyā kahīñ sadaf huuñ maiñ

har mauj thī bechain bahakne ko kabhī se
ḳhud aap hī dariyā meñ nahāne nahīñ utre

sūrat-e-hāl ambar ajab chiiz hai
us ne dariyā kahā maiñ kināra huā

koī dariyā ho kahīñ jo mujhe sairāb kare
ek hasrat hai jo puurī nahīñ hone vaalī

vaqt ke dariyā meñ uTThī thī abhī pahlī hī lahr
chand insānoñ ne lī ik vādi-e-pinhāñ kī raah

ab ḳhatm ho chukā hai buzurgoñ kā ehtirām
dariyā ko aa ke aaj kināre gale paḌe

josh dariyā ke qarā.in ye batāte haiñ 'zahīr'
mauj khā jā.egī sāhil ke shabistānoñ ko

ḳhair ho 'ājiz' kahīñ aisā na ho dil Duub jaa.e
ishq ke dariyā meñ halchal ho rahī hai dil ke paas

sadiyoñ se kināre pe khaḌā suukh rahā hai
is shahr ko dariyā meñ girā denā chāhiye

dariyā sabza phuul sitāre achchhī ḳhvāhish hai
patthar kāñTe dhuup gard se nafrat mat karnā

jin safīnoñ ne kabhī toḌā thā maujoñ kā ġhurūr
us jagah Duube jahāñ dariyā meñ tuġhyānī na thī

dikhā.e beach dariyā kaun rasta
falak ḳhālī hai taare jā chuke haiñ

jo gir ke raah meñ uThne kā azm rakhtā hai
vo paar aag kā dariyā bhī kar hī jā.egā