Tags-Dariya

himmat-e-tark-e-vafā Duub ga.ī
kis ne āñkhoñ meñ utārā dariyā

pā ke tūfāñ kā ishārā dariyā
toḌ detā hai kinārā dariyā

ai asīr-e-ġham sāhil idhar aa
beach dhāre se pukārā dariyā

ahl-e-himmat ne Duboyā sab ko
nā-ḳhudāoñ se na haarā dariyā

band afkār ne bāñdhe lekin
chaḌh ke utrā na hamārā dariyā

sail-e-himmat haiñ hamāre baazū
Duub jā.egā tumhārā dariyā

mauj ne pūchh liyā kal 'tarzī'
kashtī pyārī hai ki pyārā dariyā

kaise Dūbegī bhañvar meñ kashtī
kaise degā na sahārā dariyā

hudūd meñ apnī rah ke shāyad bachā sakūñ maiñ vajūd apnā
maiñ ek qatra huuñ mujh ko dariyā ke rāste par na Daal denā

maiñ na hotā to yuuñ lab-e-dariyā
aabrū tishnagī kī rakhtā kaun

ik aisā vaqt bhī sahrā meñ aane vaalā hai
ki rāsta yahāñ dariyā banāne vaalā hai

ik jagah ham banā.eñge dariyā
ik jagah tishnagī banā.eñge

ye nazar kī tishnagī ye salsabīl-e-husn-e-yār
jī sulagtā hai laboñ ke paas dariyā dekh kar

ḳhvāb pahlī azaan par TuuTā
ham the dariyā meñ kūdne vaale

sunī na dasht yā dariyā kī bhī kabhī maiñ ne
ki be-ḳhudī meñ guzārī hai zindagī maiñ ne

hastī se mil gayā mujhe kuchh nīstī kā fahm
sahrā vahāñ milā jahāñ dariyā utar gayā

jahāñ dariyā kahīñ apne kināre chhoḌ detā hai
koī uThtā hai aur tūfān kā ruḳh moḌ detā hai

bichhaḌ ke tujh se kuchh jaanā agar to is qadar jaanā
vo miTTī huuñ jise dariyā kināre chhoḌ detā hai

lahr dariyā ke saath rahtī hai
bijlī bādal meñ hai ajab rishta

mirī is chashm-e-tar se abr-e-bārāñ ko hai kyā nisbat
ki vo dariyā kā paanī aur ye ḳhūn-e-dil hai barsātī