Tags-Aangan

chāhatoñ bhare kamre dil khule khulā āñgan
ab to DhūñDne par bhī aise ghar nahīñ milte

koī dekhe adhūrā-pan hamārā
ki ghar bhī hai to be-āñgan hamārā

jab bhī nādīda sapnoñ ne man āñgan meñ raqs kiyā
terī yaad ke jugnū chamke raat Dhale ḳhāmoshī se

jāgte manzar chhateñ dālān āñgan khiḌkiyāñ
ab ke phere meñ havā ye bhī uḌā le jā.egī

vo to 'bedil' koī sūkhā huā pattā hogā
tere āñgan meñ kahāñ un ke qadam aate haiñ

yādoñ ke darīchoñ se bachpan kī galī jhoñke
'rāhī' mire āñgan meñ mamtā kī havā aa.e

īstāda the sitāre tirī dahlīz ke saath
chāñd be-chain thā āñgan meñ utarne ke liye

tumhāre shahr meñ āñgan nahīñ hai
kahīñ tulsī nahīñ chandan nahīñ hai

dil ke dukh se dekho maiñ ne
āñkhoñ kā ye āñgan dhoyā

kahāñ ga.e vo jin ke dam se khetoñ meñ hariyālī thī
suunī kyuuñ gaañv kī galiyāñ kyuuñ āñgan vīrān huā

shakl ban jā.ūñgā bādal meñ kabhī purvā meñ ubhar jā.ūñgā
maiñ kisī yaad kā jhoñkā ban kar tere āñgan se guzar jā.ūñgā

kyuuñ nahīñ mujh ko bhī pyārā hai vatan hai magar saarī zamīñ apnā chaman
kisī āñgan meñ khilā huuñ 'vāqif' kisī dhartī pe bikhar jā.ūñgā

andhī rātoñ kī syāhī mirā maqdūr huī
koī taarā mire āñgan na girā tere ba.ad

vo dhuup vo galiyāñ vahī uljhan nazar aa.e
is shahr se us shahr kā āñgan nazar aa.e

gul-hā-e-nau-bahār haiñ āñgan meñ zard zard
peḌoñ pe khil rahī hai ḳhizāñ ghar udaas hai

mire to apne hī āñgan meñ paañv zaḳhmī hue
mujhe yahāñ pe kisī par bhī e'tibār nahīñ

suḳhnavar kā ye āñgan hai 'razā' sheroñ kī ḳhushbū hai
ġhazal aur giit nazmoñ kī yahāñ phul-vāriyāñ hoñgī

āñgan meñ phir chiḌiyāñ bolīñ
tū ab so kar uTThā hogā

chhīn kar 'shādāb' koī le gayā
ik anokhā sukh jo ghar-āñgan meñ thā

mere zehn-o-dil meñ fikr-o-fan meñ thā
niim kā vo peḌ jo āñgan meñ thā