Tags-Aangan

dil pe hai chhāyā huā bedār ḳhvāboñ kā tilism
zehn ke āñgan meñ lahrātī haiñ kuchh parchhā.iyāñ

maiñ ghabrā kar tujh ko pukārūñ to ye falak
āñgan biich bahut ūñchī dīvār lage

mere ghar ke bhī dar-o-bām kabhī jāgeñge
dhuup niklegī kabhī to mire bhī āñgan meñ

ye kaisā hādsa guzrā ye kaisā sāneha biitā
na āñgan hai na chhat baaqī na haiñ dīvār-o-dar baaqī

ho ga.e āñgan judā aur rāste bhī baT ga.e
kyā huā ye log kyuuñ ik dūsre se kaT ga.e

jāgtī āñkheñ thiiñ apnī aur ham
ḳhvāb ke āñgan meñ pal do pal ga.e

apnī sāñsoñ kī ḳhushbū ko ghol ke merī sāñsoñ meñ
merā suunā jīvan-āñgan mahkātā hai jaane kaun

raat āñgan meñ chāñd utrā thā
tum mile the ki ḳhvāb dekhā thā

raat kī palkeñ bhī ḳhālī ghar ke āñgan kī tarah
raushnī ke vāste koī diyā to chāhiye

dil ke pyāse āñgan meñ kal yaad ke bādal yuuñ aa.e
der talak ye tan-man bhīgā be-mausam barsāt huī

kabhī to chāñd bhī utregā dil ke āñgan meñ
kabhī to mauj meñ aa.egā ye kinārā bhī

shajar āñgan kā jab sūraj se larzāñ hone lagtā thā
koī saaya mire ghar kā nigahbāñ hone lagtā thā

chāñd ban kar tū mire āñgan meñ utrā hai zarūr
nuur itnā bām-o-dar par aaj tak bikhrā na thaa!

chhoTe se āñgan meñ hotī hai jo baat
phailā kartī hai vo aksar chāroñ aur

avval avval to har shab qayāmat huī rafta rafta hameñ aisī aadat huī
ghar ke āñgan meñ ġham raqs karte rahe ġhul machāte rahe aur ham so ga.e

mīThe gītoñ kī vo risnā mīThī dhun aur mīThe bol
pūran-māshī par āñgan meñ shab-bedārī hotī thī

aise ab ke yaad aa.ī is mah-e-do-hafta kī
chāñdnī utar aa.ī jaise ghar ke āñgan meñ

vahshateñ haiñ raqsinda har galī har āñgan meñ
tere ahd-e-zarrīñ meñ ashk-e-ḳhūñ haiñ dāman meñ

chāñd haiñ na taare haiñ āsmāñ ke āñgan meñ
raqs karte haiñ sho.ale ab to shab ke dāman meñ

ek hī ghar ke rahne vaale ek hī āñgan ek hī duvār
jaane kyuuñ baḌhtī jaatī hai nafrat bhaa.ī bhaa.ī meñ