Tags-Aankh

kyā hai mere dil kī hālat vāqa.ī kaise kahūñ
kyuuñ hai merī aañkh meñ itnī namī kaise kahūñ

kyuuñ chashm-e-mast ho ga.e jām-e-sharāb aaj
kyā ho gayā jo aañkh tumhārī badal ga.ī

aayā jo nasha mai kā to shab aañkh meñ us kī
sau rañg se bad-mastī kā rañg aan ke chamkā

ho sabab kuchh bhī mire aañkh bachāne kā magar
saaf kar duuñ ki nazar kam nahīñ aatā hai mujhe

kyā dukh hai samundar ko batā bhī nahīñ saktā
aañsū kī tarah aañkh tak aa bhī nahīñ saktā

rūdād-e-ġham-e-ulfat un se ham kyā kahte kyūñkar kahte
ik harf na niklā hoñToñ se aur aañkh meñ aañsū aa bhī ga.e

mukh par ruup se dhuup kā aalam baal añdherī shab kī misāl
aañkh nashīlī baat rasīlī chaal balā kī bāñkī hai

aañkh se aañsū nikal jā.eñge aur Tahnī se phuul
vaqt badlegā to sab qaidī rihā ho jā.eñge

har ik faisla us ne behtar kiyā
mujhe aañkh dī tum ko manzar kiyā

lo hoshyār ho jaao aur aañkh kholo
na lo karvaTeñ aur na bistar TaTolo

vo aañkh bujh ga.ī jis se charāġh jalte the
tamām tiira gharoñ meñ koī ḳhabar de de

aañkh to ab tak tilism-e-ḳhāl-o-ḳhad kī hai asiir
dil nikaltā hī nahīñ tasvīr meñ Duubā huā

pyaar kī aañkh se dushman ko bhī jo dekhte haiñ
ham ne aise bhī haiñ allāh ke pyāre dekhe

bāñhoñ meñ aa sakā na havelī kā ik sutūn
putlī meñ merī aañkh kī sahrā simaT gayā

vo aa ga.e haiñ to aañsū zarūr poñchheñge
ab aañkh kyuuñ mirī ashkoñ se tar nahīñ hotī

aañkh rah taktī rahī dil us ko samjhātā rahā
apnā apnā kaam donoñ umr-bhar karte rahe

aañkh raushan ho to duniyā ke añdhere kyā haiñ
rasta mahtāb ko rātoñ kī siyāhī meñ milā

har qatra mirī aañkh se bahne ko thā betāb
har zarra mire paañv jhulasne ke liye thā

uThtī nahīñ hai aañkh magar us ke rū-ba-rū
nādīda ik nigāh kiye jā rahā huuñ maiñ

kaisā jhūTā sahārā hai ye dukh se aañkh churāne kā
koī kisī kā haal sunā kar apnā-āp chhupātā hai