Tags-Aankh

dil kī yād-dahānī se
aañkh khulī hairānī se

shiddat-e-dard-e-jigar ho ye zarūrī to nahīñ
aur phir aañkh bhī tar ho ye zarūrī to nahīñ

dard ko aañkh banāyā hai to phir jā ke kahīñ
dil pe likkhī huī tahrīr nazar nazar aa.ī hai

khulī jo aañkh to ham Dūbte nazar aa.e
ga.e the duur se girdāb dekhne ke liye

sāmne hoñ to aañkh khultī nahīñ
jāgte haiñ ham un ke ḳhvāboñ meñ

aañkh kahīñ par hotī thī
baat kisī se karte the

tumhāre hijr meñ bāñdhā hai vo samāñ ham ne
ki aañkh ham se milātā hai nauhagar bhī nahīñ

dil meñ tasvīr tirī aañkh meñ āsār tire
zaḳhm hāthoñ meñ liye phirte haiñ bīmār tire

kahūñ kyā ki dasht-e-hayāt meñ rahā silsila vo sarāb kā
kabhī hausla hī na kar sakī mirī aañkh dariyā ke ḳhvāb kā

hamārī aañkh kī putlī meñ ashk kī sūrat
chamak rahā hai kisī shahr-e-be-misāl kā dukh

huuñ mahv-e-dīd aañkh uThā.ūñ maiñ kis taraf
dekhūñ maiñ kis ko juz tire husn-e-butāñ hai hech

dam-e-nazāra merī hairatoñ pe ġhaur na kar
ki merī aañkh azal yūñhī savālī hai

aañkh se aañsū churā le gayā lekin vo shaḳhs
be-guhar siip yahīñ chhoḌ gayā hai sāhab

aañkh meñ dhundlā gayā nikhre hue chehroñ kā rañg
jagmagāte ā.inoñ ko kis ne mailā kar diyā

ham ne phir shaffāf rastoñ par bichā.ī aañkh aañkh
ham ne phir ā.īna-e-dil reza reza kar diyā

sar-e-dasht-e-tār guzār leñ kisī taur raat ye umr kī
na lagegī aañkh agar yuuñ hī hameñ fikr-e-shab-basrī rahī

tanhā the jab to aañkh ke aañsū bhī dil meñ the
vo aa gayā to zabt kā yaarā nahīñ rahā

āvāra o rusvā hī sahī ham manzil-e-shab meñ
ik sub.h-e-bahārāñ se magar aañkh laḌī hai

hoñToñ pe hañsī aañkh meñ tāroñ kī laḌī hai
vahshat baḌe dilchasp do-rāhe pe khaḌī hai

aañkh vāloñ ke karam se aaj vo raat aa ga.ī
jab kisī andhe ke hāthoñ meñ diyā denā paḌe