Tags-Aankh

ashk ne kiiñ ishq kī ġhammāziyāñ
rāz-e-darūñ aañkh ne ifshā kiyā

gumāñ se bhī ziyāda chāhiye sarsabz kisht-e-jāñ
faqat pichhle pahar kyā har pahar ai aañkh barsā kar

aaj tak ashk mirī aañkh se girte haiñ safed
zarf meñ apne ye rakhtā hai subū paanī ek

jab se huī hai aañkh shab-e-ġham se āshnā
nā-āshnā haiñ lazzat-e-ḳhvāb-e-sahar se ham

rūdād-e-ġham-e-ulfat un se ham kyā kahte kyūñkar kahte
ik harf na niklā hoñToñ se aur aañkh meñ aañsū aa bhī ga.e

ham arz-e-vafā bhī kar na sake kuchh kah na sake kuchh sun na sake
yaañ ham ne zabāñ hī kholī thī vaañ aañkh jhukī sharmā bhī ga.e

qaa.em rahī junūñ meñ bhī ik vaz-e-ehtiyāt
dil ḳhuun ho gayā hai magar aañkh nam nahīñ

koī charāġh na jugnū na aa.ina na kitāb
ye kaisā ḳhvāb mirī aañkh par utārā hai

tasavvur-e-ruḳh-e-jānāñ kiye hue ham log
hamārī aañkh meñ aañsū nahīñ sitārā hai

aap ro.e kyuuñ āḳhir sun ke qissa-e-'manzūr'
aap hī batā.eñ to aañkh kyuuñ bhar aa.ī hai

bas mujhe darmiyān meñ rakhnā
aañkh ojhal pahāḌ ojhal hai

aañkh hai aa.ina hai mash.al hai
koī tasvīr to mukammal hai

aag aisī lagī thī siine meñ
aañkh se dil meñ vo utar na sakā

rah gayā aañkh meñ nazākat se
dil meñ naqsha tirā utar na sakā

be-dilāñ suuñ na phirā do mukhḌā
ham se tum aañkh churāyā na karo

kuchh aisī baat kabūtar kī aañkh meñ dekhī
uqaab ḳhauf ke maare uḌaan bhuul gayā

zarā dhīmī ho to ḳhushbū bhī bhalī lagtī hai
aañkh ko rañg bhī saare nahīñ achchhe lagte

ek chehra hai aañkh meñ har-dam
dil se pūchheñ mo.āmla kyā hai

sahrā kī tarah ḳhushk thī phir us ke lams se
be-iḳhtiyār aañkh meñ aañsū kahāñ se aa.e

bāda-e-nūr ke do qatre haiñ ye raat aur din
aañkh be-ant kī gahrā.ī kā paimāna hai