Tags-Aankh

naza.a meñ un se pher leñ āñkheñ
chaar aañkh ab qazā se hotī hai

vo jin kī aañkh kā taara bhī huuñ maiñ
un hī ke paañv kā chhālā bhī huuñ maiñ

surma.ī aañkh hasīñ jism gulābī chehrā
is ko kahte haiñ kitābat pe kitābat karnā

dil bhar aatā hai mirā dekh ke nam aañkh koī
apne rone pe to ab mujh ko hañsī aatī hai

paañv kī tāqat taaq huī to band kī aañkh aur jā pahuñche
'ārzū' us ko ḳhuub kiyā kam rāste meñ jo tuul paḌā

har taraf phuul haqīqat ke khile haiñ lekin
aañkh meñ ḳhvāb-e-haqīqat ke sivā kuchh bhī nahīñ

bikhar rahe the har ik samt kā.enāt ke rañg
magar ye aañkh ki jo DhūñDtī thī zaat ke rañg

pās-e-adab hai kyā uThe aañkh is ke rū-ba-rū
is meñ savāl-e-jur.at-e-rindāna to nahīñ

niiñd kī sūrat nahīñ dekhā ba-juz dāġh-e-jigar
parda merī aañkh meñ shāyad ki hai kam-ḳhvāb kā

jahāñ kī rañgīniyoñ kī hamrāz aañkh patthar banī huī hai
ye haal ab ho gayā hai dil kā na ro sakeñ ham na muskurā.eñ

use pasand nahīñ ḳhvāb kā havāla bhī
to ham bhī aañkh pe nīndeñ harām karte haiñ

dil to jalvoñ se bad-havās hī thā
aañkh bhī bad-havās rahtī hai

ye kaun terī tarah merī aañkh meñ chamkā
jalā.ī kaisī ye qindīl-e-bad-duā tū ne

phir nazar aa.egī āsān ye duniyā tujh ko
aañkh se dekh magar dil ko tamāshā.ī kar

aur kuchh der Thahar jaao ki phir nashtar-e-sub.h
zaḳhm kī tarah har ik aañkh ko bedār kare

aañkh uThne lagī terī aur sharm zarā kam ho
shīshe meñ dikhā dūñgā phir tujh ko parī-ḳhāna

tumhārī aañkh meñ aañsū dikhā.ī dete haiñ
tum itnī zor se hañs ke chhupā rahe kyuuñ ho

har shāḳh-e-tamannā par merī har-chand ki barg-o-bār lage
vo peḌ jo mere naam kā hai, har aañkh ko sāya-dār lage

shām-e-firāq shiddat-e-ġham be-shumār hai
mushtāq-e-dīd aañkh bhī ab ashk-bār hai

aañkh se dil meñ aane vaalā
dil se nahīñ ab jaane vaalā