Tags-Aankh

jism meñ gūñjtā hai ruuh pe likkhā dukh hai
tū mirī aañkh se bahtā huā pahlā dukh hai

aañkh sharmā.ī huī hai baal peshānī pe haiñ
ā.īna-ḳhāne meñ jaate haiñ sañvarne ke liye

aañkh vo aañkh jo har qatre meñ dariyā dekhe
tū magar sāmne aa jaa.e to phir kyā dekhe

ye jahān dām-e-fareb hai jo chale to dekh ke chal zarā
jo tujhe ḳhayāl ho diid kā to samajh ke aañkh yahāñ uThā

kisī kī aañkh kā taarā huā karte the ham bhī to
achānak shaam kā taarā nazar aayā to yaad aayā

jaan se ho ga.e badan ḳhālī
jis taraf tū ne aañkh bhar dekhā

tirī taaza muskurāhaT se bhar aa.ī aañkh yaanī
kahīñ ye nishān-e-manzil bhī ġhubār ho na jaa.e

ho subuk-raftār kitnī hī nasīm-e-sub.h-dam
aañkh khul jaatī hai phir bhī nargis-e-bīmār kī

ḳhuun kar ke dil hamārā phir ga.ī vo mast aañkh
ek hī chullū meñ niyyat bhar ga.ī mai-ḳhvār kī

mohr kī un par zarūrat kyā hai ai pīr-e-muġhāñ
ek ik ḳham par lagī hai aañkh har mai-ḳhvār kī

ḳhvāb talak rihā.ī thī tere firāq-o-hijr se
aañkh khulī to aa.ine tah meñ kahīñ utar ga.e

band kiiñ āñkheñ ki dekhūñ ḳhvāb-e-sub.h
khol kar jab aañkh dekhā raat thī

maiñ 'nayyar' kyā dikhā.ūñ zaḳhm dil kā
kisī kī aañkh ḳhud nam ho ga.ī hai

aañkh khulte hī jabīñ chūmne aa jaate haiñ
ham agar ḳhvāb meñ bhī tum se laḌe hote haiñ

ho sabab kuchh bhī mire aañkh bachāne kā magar
saaf kar duuñ ki nazar kam nahīñ aatā hai mujhe

na jaao band kiye aañkh rah-ravān-e-adam
idhar udhar bhī ḳhabar-dār dekhte jaao

tumhārī aañkh mire dil se le sabab be-vaj.h
huī hai laḌne ko tayyār dekhte jaao

uThāo aañkh na sharmāo ye to mahfil hai
ġhazab se jānib-e-aġhyār dekhte jaao

hamārī aañkh ke parde meñ tum chhupo dekho
tumhārī aisī ho lailā to aisā mahmil ho

dekhā na tum ne aañkh uThā kar bhī ek baar
guzre hazār baar tumhārī galī se ham