Tags-Aankh

ḳhizāñ se kaun sī shai chhīn lī bahāroñ ne
guloñ ko aañkh dikhā.ī chaman meñ ḳhāroñ ne

niiñd kuchh kar le ki taaza aañkh pe sūraj khule
sub.h sāhil par utarnā hai to is kashtī meñ aa

shab-e-firāq sahī us kī aañkh to lag jaa.e
vo aah kījiye kaise ki jo ravā bhī nahīñ

har aañkh barf huī jā rahī hai hasrat se
qarīb-o-dūr koī sho.ala-e-hinā bhī nahīñ

tahvīl-e-intizār meñ kab tak rahegī aañkh
mere supurd merī nazar kā ma.aal kar

ma.adūm us kī aañkh se pahchān ho ga.ī
jaise ki mill rahī thī kisī ajnabī se maiñ

ḳhvāb 'mas.ūd' kyā vo dekhegā
aañkh jis kī lagī nahīñ hogī

na kisī kī aañkh kā nuur huuñ na kisī ke dil kā qarār huuñ
kasī kaam meñ jo na aa sake maiñ vo ek musht-e-ġhubār huuñ

ik bevafā ke sāmne aañsū bahāte ham
itnā hamārī aañkh kā paanī marā na thā

dīvāna hai 'muhib' tū terī shikasta-hālī
dekhe jo aañkh uThā kar dildār hai ta.ajjub

phuul kī aañkh meñ shabnam kyuuñ hai
sab hamārī hī ḳhatā ho jaise

kyuuñ sitāre haiñ kahīñ aur kahīñ aañsū haiñ
aañkh vāloñ ne yahī ramz nahīñ jaanī hai

parā.ī aañkh kī putlī sahārā kyā detī
vahāñ ik aur bhañvar thā bhañvar se aage bhī

ye be-sabab nahīñ aa.e haiñ aañkh meñ aañsū
ḳhushī kā lamha koī yaad aa gayā hogā

ham us kī aañkh meñ rah kar bhī āñsuoñ meñ rahe
jise ham apnī ragoñ meñ samānā chāhte haiñ

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge

ragoñ meñ dauḌte phirne ke ham nahīñ qaa.il
jab aañkh hī se na Tapkā to phir lahū kyā hai

Taañg girne se TuuT jaa.e to
aañkh mirchoñ se phuuT jaa.e to

farq itnā hai ki hairāñ ho ke rah jaatī hai aañkh
aag barsātā thā pahle dīda-e-shādāb bhī

aañkh bhī sāmne hone pe yaqīñ rakhtī hai
ḳhvāb-dar-ḳhvāb suhūlat kā maza letā huuñ