Tags-Aankh

kahā vo jo savālī aañkh kī putlī pe likkhī thī
kahā sab se mo.assir to vahī tahrīr hotī hai

kaun kahtā hai ki tū ne hameñ haT kar maarā
dil jhapaT aañkh laḌā nazroñ se DaT kar maarā

kabhī us se duā kī khetiyāñ sairāb karnā
jo paanī aañkh ke andar kahīñ Thahrā huā hai

aañkh se dil meñ utartī huī yādoñ kī barāt
dasht-e-tanhā.ī meñ TuuTe hue tāroñ kā hujūm

kar ke ḳhvāb aañkh meñ pahle to vo laa.e ḳhud ko
aur phir mujh ko jagāne ko satā.e ḳhud ko

aañkh se uḌ gayā hai tā.ir-e-naum
ḳhvāb meñ thā guzar udāsī kā

aañkh vīrāñ hai zehn gum-sum hai
aur dil hai nagar udāsī kā

jo soch saktā hai vo zehn jal rahā hai abhī
jo dekh saktī hai vo aañkh ḳhuuñ meñ tar hai yahāñ

jahān-e-zulm-o-jafā ke mālik koī na ho ashk-bār kab tak
jo dil hī majbūr ho chukā ho to aañkh par iḳhtiyār kab tak

kitāb khol ke dekhūñ to aañkh rotī hai
varaq varaq tirā chehrā dikhā.ī detā hai

kaise us ko dil kī hālat samjhā.ūñ
baat karūñ to aañkh churāne lagtā hai

aañkh jaise koī samundar ho
aur lahja sharāb thā us kā

na jaane maiñ kahāñ bhaTkā kiyā ḳhvāboñ kī bastī meñ
khulī jab aañkh to dekhā thakan bistar pe rakkhī thī

aañkh phir jaatī hai māshūqoñ kī māyūsoñ se
ġham-zada kuchh nahīñ hasrat kī nazar kuchh bhī nahīñ

har ek aañkh meñ hotī hai muntazir koī aañkh
har ek dil meñ kahīñ kuchh jagah nikaltī hai

aadhī raat huī to ġham ne chupke se dar khol diye
ādhoñ ne to aañkh na kholī aadhe aaj guzāre log

maiñ ro rahā huuñ magar sāneha batātā hai
ki us kī aañkh se vābastagī nahīñ puurī

tah-ba-tah manzar khulegā aañkh par
aa.ina hai aa.ine ke sāmne

ġharaz vo din ki jab se dil nishān ġham kā duur thā
ġharaz vo din ki aañkh meñ bharā huā surūr thā

vo prem se bhare bachan ki jin se kān-āshnā
vo mast aañkh mad-bharī ki jis se jaan āshnā