Tags-Aankh

mausam agar hai sard to phir aag taap le
chamkegī aañkh ḳhuuñ meñ harārat bhī aa.egī

anjām-e-ishq dekh liyā apnī aañkh se
ab to safī' dimāġh kā tere ḳhalal gayā

dil ye kahtā hai ki royā jaa.e
aañkh ke pyāloñ ko dhoyā jaa.e

ik niiñd hai ki aañkh se lag kar nikal ga.ī
ab raat kā tavīl safar dhuup chāhiye

dil kā pahlū meñ gumāñ hotā nahīñ
aañkh ban jaatī hai patthar raat meñ

jis ke liye be-ḳhvāb rahā kartī haiñ āñkheñ
vo aañkh bhī āshufta magar hai ki nahīñ hai

haath aa.e ḳhushī to ḳhush holo
dil ho ġhamgīñ to aañkh nam na karo

yād-e-ayyām ke darvāze se mat jhāñk mujhe
aañkh se duur na ho dil meñ samāne vaale

jalva-e-husn sazā-vār-e-nazar ho na sakā
kuchh nahīñ dekh sake aañkh uThāne vaale

tere jism kī dhaar kaTār sī aañkh ke pardoñ meñ taḌpī thī
ḳhākistar āñkhoñ meñ kyā kyā un lamhoñ ke nagīñ milte haiñ

terī udaas aañkh se mere ḳhamosh hoñT tak
harf-e-visāl kyā huā ek diyā aur ek phuul

jis aañkh ne dekhā tumheñ detī hai gavāhī
tum jaisā zamīñ par koī paikar nahīñ utrā

adā hamīñ ne sikhā.ī nazar hamīñ ne dī
hamīñ se aañkh churāo ho yaar dekho to

baiThe to paas haiñ par aañkh uThā sakte nahīñ
jī lagā hai pa abhī haath lagā sakte nahīñ

sunā hai hashr meñ har aañkh use be-parda dekhegī
mujhe Dar hai na tauhīn-e-jamāl-e-yār ho jaa.e

'taslīm' rū-e-yār ko hasrat kī aañkh se
achchhā nahīñ hai shauq meñ har baar dekhnā

diid kī tamannā meñ aañkh bhar ke ro.e the
ham bhī ek chehre ko yaad kar ke ro.e the

laboñ meñ rabt nahīñ aañkh hai magar sarshār
gulāb rahne de ḳhushbū kā aasrā le jā

dil ko ranjīda karo aañkh ko pur-nam kar lo
marne vaale kā koī der to mātam kar lo

ye merī aañkh kī masjid hai paañv dhyān se rakh
ki is meñ ḳhvāb koī etakāf kartā rahā