Tags-Aankh

ārzu-e-hūr kyā ho 'nāz' dil de kar unheñ
sham.a par kyā aañkh Dāleñ māh-e-kāmil dekh kar

jo ḳhvāb niiñd se bhī chhup ke dekhtā thā maiñ
kisī kī aañkh se us kā nazāra karnā paḌā

rote rote aañkh hañse to hañsne do
hoñToñ par muskān ko zinda rahne do

ek samundar aañkh meñ thā maujzan 'tālib' magar
umr-bhar ham tishna-lab bhaTkā kiye sahrāoñ meñ

dil-o-nigāh pe kyuuñ chhā rahā hai ai saaqī
ye terī aañkh kā nashsha sharāb se pahle

niile piile siyāh surḳh safed sab the shāmil isī tamāshe meñ
yūrish-e-rañg ne zalīl kiyā aañkh gum ho ga.ī tamāshe meñ

dekhte bhī vo nahīñ aañkh uThā kar ham ko
saad hotā nahīñ sarkār meñ chehrā apnā

kabhī vo aalam ki us taraf aañkh hī na uTThe
kabhī ye hālat ki us ko dīvāna-vār dekhūñ

mubtalā ḳhud ko kisī ġham meñ musalsal rakhnā
aur us ġham ko tirī aañkh se ojhal rakhnā

dūsroñ kī aañkh le kar bhī pashemānī huī
ab bhī ye duniyā hameñ lagtī hai pahchānī huī

kyuuñ churātā hai vo kāfir mujh se aañkh
kyā nigāh-e-chashm-e-hasrat dekh lī

aañkh terī adā kī qaid meñ hai

dil mirī aañkh meñ dhaḌaktā hai

ye aarzū hai aañkh meñ surma lagā.eñge
ai 'dāġh' ḳhāk-e-pā-e-rasūl-e-ḳhudā se ham

aañkh manzar banātī rahtī hai
ya.anī sāmān tere hone kā

aañkh jhapkī to ravāñ thī vo havā ke ruḳh par
ham ne jo ret kī dīvār banā.ī pahroñ

is se pahle ki sabā āñkh-micholī khele
band kar do dar-e-ummīd kā har har rauzan

tārīk thā apnī hī nazar kā koī pahlū
sūraj to kabhī aañkh se ojhal na huā thā

vo baat ab kahāñ ki diloñ ko kare ġhulām
bas ik chamak hai aañkh meñ paanī to hai nahīñ

havas kā aks paḌegā akele kamre meñ
koī na hogā to ā.īna aañkh māregā