Tags-Aankh

'tābish' ye terā aks nahīñ merī aañkh meñ
is jhiil meñ ye partav-e-zartāb aur hai

bhīgī bhīgī hai har kiran un kī
hai sitāroñ kī aañkh bhī pur-nam

vo khaḌe haiñ vo tasavvur ab tujhe maiñ kyā kahūñ
aañkh mahv-e-dīd kar diid se mahrūm hai

vo aañkh jo sahrā kī tarah hai yak-o-tanhā
is raah meñ rakh do koī barsāt kisī din

tifl-e-ashk aañkh tak aatā hai ye kahtā hai 'rashīd'
mujh ko mardum ne jo rokā to machal jā.ūñgā

kabhī sāhiloñ pe phiroge to tumheñ sīpiyāñ hī batā.eñgī
mirī aañkh meñ jo simaT gayā vahī ashk sab se hasīn thā

aañkh uThā.ī hī thī ki khaa.ī choT
bach ga.ī aañkh dil pe aa.ī choT

surma-e-chashm-e-ināyat kī hikāyat chhoḌo
aaj har aañkh meñ aahoñ kā dhuāñ hai ki nahīñ

'nadīm' rishtoñ kī har aañkh shab-zada hai yahāñ
har ek chehra hai jaise sarāb mere liye

aa jaa.e na dil aap kā bhī aur kisī par
dekho mirī jaañ aañkh laḌānā nahīñ achchhā

lab par āh-e-musalsal aañkh meñ paanī hai
tanhā.ī kā har lamha nuqsānī hai

ashk ko aañkh kī dahlīz pe laayā na karo
dil ke hālāt zamāne ko batāyā na karo

maiñ tirī aañkh se Dhalkā huā ik aañsū huuñ
tū agar chāhe bikharne se bachā le mujh ko

miTā jo aañkh ke shīshoñ se us kā aks 'nasīm'
ragoñ meñ phail gayā ḳhuuñ kī aarzū ho kar

Dubā dil kā ghar aañkh tak aan pahuñchā
ab aañsū kā naalā ubalne lagā hai

andhā banā.eñge vo rulā kar itaab se
rahte haiñ roz aañkh churāne kī ghaat meñ

tāroñ kī aañkh bhī bhar aa.ī merī sadā-e-dard par
un kī nigāheñ bhī tirā naam batā ke rah ga.iiñ

aañkh pe paTTī bāñdh ke mujh ko tanhā chhoḌ diyā hai
ye kis ne sahrā meñ lā kar sahrā chhoḌ diyā hai

zindagī hī zindagī chāroñ taraf hai
aañkh ho to raushnī chāroñ taraf hai

aañkh se ojhal tirā chehra hai lekin
ik alāmat sī tirī chāroñ taraf hai