Tags-Aankh

dekhne ke liye ik chehra bahut hotā hai
aañkh jab tak hai tujhe sirf tujhe dekhūñgā

maiñ hī tum ko phūTī aañkh nahīñ bhātī
tum ne sab se pyaar ke pech laḌā.e haiñ

un se duniyā ko badalne kī qasam khaa.ī thī
un se ab aañkh milāte hue sharm aatī hai

aañkh uThā kar bhī nahīñ dekhtā ab din meñ jise
kitnā bechain rakhā mujh ko usī ne shab-bhar

ye mire dil kī chamak hai ki tirī aañkh kā nuur
zehn meñ nāchte rahte haiñ nagīne shab-bhar

zindagī mahv-e-ḳhud-ārā.ī thī
aañkh uThā kar bhī na dekhā ham ne

ham yūñhī mubtalā se rahte haiñ
yā kisī aañkh kī muravvat hai

dil o nigāh kā ye fāsla bhī kyuuñ rah jaa.e
agar tū aa.e to maiñ dil ko aañkh meñ rakh luuñ

chaman kī aañkh se mausam ke husn ko dekhūñ
bahār aa.e to pattoñ ke pairahan pahnūñ

chāhtā huuñ ki maiñ uTh kar dekhūñ chhat se ākāsh kā manzar dekhūñ
abhī chhat tak hī pahuñchtī hai aañkh paañv ziine se phisal jaatā hai

vo koī ḳhaas chamak DhūñDhtā rahā 'zīshān'
hamārī aañkh safar kā ġhubār laa.ī thī

jo hujūm-e-ġham se hai aañkh nam to laboñ pe naale haiñ dam-ba-dam
use kis tarah se chhupā.eñ ham kahīñ rāz-e-ishq chhupā bhī hai

sail-e-ġham aañkh ke parde meñ nihāñ rakhte haiñ
nā-tavāñ bhī tire kyā tāb-o-tavāñ rakhte haiñ

aañkh kholī hai to sayyād ke ghar kholī hai
ham qafas par hī nasheman kā gumāñ rakhte haiñ

ab is kā chāra hī kyā ki apnī talab hī lā-intihā thī varna
vo aañkh jab bhī uThī hai dāmān-e-dard phūloñ se bhar ga.ī hai

aañkh jhapke na kahīñ raah añdherī hī sahī
aage chal kar vo kisī moḌ pe mil jā.egā

ye husn-e-ḳhatm-e-safar ye tilism-ḳhāna-e-rañg
ki aañkh jhapkūñ to manzar nayā hai mere liye

dekhne niklā huuñ duniyā ko magar kyā dekhūñ
jis taraf aañkh uThā.ūñ vahī chehra dekhūñ

ik sarāpā surūr-o-bad-mastī
aañkh kyā hai sharāb hai pyāre

bichhaḌte vaqt to kuchh us meñ ġham-gusārī thī
vo aañkh phir to har ik kaifiyat se aarī thī