Tags-Aarzoo

yahāñ to kaam tamannā hī meñ tamām huā
magar unhoñ ne na pūchhā ki aarzū kyā hai

jo mirī shaboñ ke charāġh the jo mirī umiid ke baaġh the
vahī log haiñ mirī aarzū vahī sūrateñ mujhe chāhiyeñ

shab-e-firāq ajal kī thī aarzū mujh ko
ye roz roz to maiñ ne na marnā chāhā thā

manzil kā mujh ko hosh na apnī ḳhabar hai aaj
vo jān-e-ārzū jo mirā ham-safar hai aaj

abhī talab ne jhameloñ meñ Daal rakkhā hai
abhī to sīkhnā hai terī aarzū karnā

bāhar nikal ke dekh tirī aarzū meñ koī
kab se paḌā huā tire dar par niDhāl hai

na kuchh ḳhatra ḳhizāñ kā hai na ehsān-e-bahār us par
adam se apnī shāḳh-e-ārzū be-barg-o-bār aa.ī

terī ulfat sho.abada-parvāz hai
aarzū gar hai tamannā-sāz hai

ḳhamoshī merī ma.anī-ḳhez thī ai aarzū kitnī
ki jis ne jaisā chāhā vaisā afsāna banā Daalā

darvāza go khulā hai ijābat kā par 'hasan'
ham kis kis aarzū ko ḳhudā se talab kareñ

mujhe shauq-e-bandagī meñ yahī ek aarzū hai
tirā naqsh-e-pā jahāñ ho mirā sar vahīñ jhukā de

aarzū meñ tirī yak muddat se
apne dil ke ta.iiñ tarsātā huuñ

nazar-e-taġhāful-e-yār kā gila kis zabāñ siiñ bayāñ karūñ
ki sharāb-e-sad-qadah aarzū ḳhum-e-dil meñ thī so bharī rahī

aarzū tadbīr ho kar rah ga.ī
justujū tāḳhīr ho kar rah ga.ī

zabāñ kī aarzū meñ Thokareñ khāte hue naġhme
rubāb-o-chañg se talvār kī jhankār tak pahuñche

sau husn le ke aa.ī hai duniyā-e-ārzū
ārā.ish-e-hayāt kā sāmāñ nazar meñ hai

gar aarzū hai tujh ko mile manzil-e-hayāt
is aarzū meñ ḳhud ko to mahv-e-safar bhī rakh

bhale hī chhāñv na de aasrā to detā hai
ye aarzū kā shajar hai ḳhizāñ-rasīda sahī

hameñ koī to sune ek aarzū meñ faqat
kisī ke haath meñ khele rabāb honā paḌā