Tags-Aarzoo

tire visāl kī kab aarzū rahī dil ko
ki ham ne chāhā tujhe shauq-e-be-sabab ke liye

aarzū hai ki rahūñ zinda mohabbat ban kar
huuñ jahāñ dafn 'asar' us ko gulistāñ kar duuñ

vahī manzileñ vahī dasht o dar tire dil-zadoñ ke haiñ rāhbar
vahī aarzū vahī justujū vahī rāh-e-pur-ḳhatar-e-junūñ

ḳhushī kī aarzū kyā dil meñ Thahre
tire ġham ne biThā rakkhe haiñ pahre

ab koī ummīd hai 'shāhid' na koī aarzū
aasre TuuTe to jiine ke vasīle ho ga.e

muddat se aarzū hai ḳhudā vo ghaḌī kare
ham tum piyeñ jo mil ke kahīñ ek jā sharāb

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

dāmān-e-ārzū ke kināre sameTte
miltā hai kab kisī ko vo sab kuchh jo chāhiye

gulshan-e-ārzū kī diid ke ba.ad
yaas kā ḳhār-zār bhī dekho

ik raat meñ simaT ga.ī kul umr-e-ārzū
ik umr intizār kiyā aur jal bujhe

kār-e-duniyā kī aarzū ne 'nabīl'
mujh ko sau uljhanoñ meñ Daalā hai

jannat se bahra-var hoñ zafar-gañj ai 'munīr'
jo jo thī aarzū mire dil meñ nikal ga.ī

uḌne kī aarzū meñ havā se lipaT gayā
pattā vo apnī shāḳh ke rishtoñ se kaT gayā

hai husūl-e-ārzū kā raaz tark-e-ārzū
maiñ ne duniyā chhoḌ dī to mil ga.ī duniyā mujhe

umr-bhar gulzār-e-hastī kī na hogī aarzū
bulbul-e-dil ko mire qaidī banā kar dekh lo

ārzū-mand-e-shahādat āshiq-e-sādiq hue
ġhair ko Dar hai tirī talvār kā fe.al-e-abas

naam kī apne tamannā yā sile kī aarzū
log karte haiñ magar 'ansār' ham karte nahīñ

ye kahāñ se aa.ī hai surḳh-rū hai har ek jhoñkā lahū lahū
kaTī jis meñ gardan-e-ārzū ye usī chaman kī havā hai kyaa?

nahīñ ġham na mil sakegī mujhe shaiḳh terī jannat
mujhe aarzū nahīñ hai na maiñ haath mal rahā huuñ

kuchh is qadar dil-e-pur-shauq be-ḳhabar bhī nahīñ
magar ba-zid hai vo anjām-e-ārzū ke liye