Tags-Aarzoo

chāhe hai phir kisī ko muqābil meñ aarzū
surme se tez dashna-e-mizhgāñ kiye hue

kabhī aarzū thā yahī dāġh-e-hasrat
mujhe jo banā de tirī mehrbānī

ye aarzū thī ki yak-rañg ho ke jī letā
magar vo aañkh jo shaitāñ bhī hai farishta bhī

kisī ko kuchh nahīñ miltā hai aarzū ke baġhair
magar ye kaun milā mujh ko justujū ke baġhair

aarzū ho ga.ī hai phir bebāk
phir ḳhabar garm koī laayā hai

harīm-e-dil meñ tirī aarzū ne raushan kī
vo aag jis ne shab-e-zindagī ujālī hai

kis jurm-e-ārzū kī sazā hai ye zindagī
aisā to ai ḳhudā maiñ gunahgār bhī nahīñ

mirī apnī aur us kī aarzū meñ farq ye thā
mujhe bas vo use saarā zamāna chāhiye thā

bhaTaktā phir rahā huuñ justujū bin
sarāpā aarzū huuñ aarzū bin

na to kufr ke na ḳhudā ke ham na davā ke ham na duā ke ham
ki butān-e-ka.aba-e-ārzū dil-e-barhaman se chale ga.e

maut aa jaa.e qaid meñ sayyād
aarzū ho agar rihā.ī kī

ik aarzū ki dil meñ rahī hai tamām-umr
tañg aa ke aaj dast-e-duā tak pahuñch ga.ī

jis shahr-e-ārzū ke nishānāt miT ga.e
dil kī nigāh phir vahīñ jaatī hai aaj bhī

ek tū kyā gayā hai jahāñ se mire
jo bhī thī aarzū sab Thikāne lagī

hijr-o-visāl-o-ranj-o-ġham hasrat-o-yās-o-ārzū
har shai ubhar ke aa ga.ī mub.ham se ik savāl meñ

jān-e-hazīñ nahīñ faqat mahv-e-fuġhān-e-ārzū
rauñdā huā sā dil bhī hai hasrat-e-pā.emāl meñ

shaam ke dhuñdlakoñ meñ Dūbtā hai yuuñ sūraj
jaise aarzū koī mere dil meñ martī hai

aarzū hai mirī mayyat pe vo ro.e kah kar
hai ye 'ājiz' mirā shaidā mirā pyārā āshiq

maiñ tañg-dast kahāñ tak libās pahnā.ūñ
barahna jism ka.ī aarzū utartī hai

marte marte dekhne kī aarzū rah jā.egī
vaa.e nākāmī ki us kāfir kā ḳhanjar tez hai