Tags-Aarzoo

hamārī aarzū apnī samajh meñ bhī nahīñ aatī
pajāma is tarah kā hai jise ulTā.e rakhte haiñ

zinda huuñ maiñ ki aag jahannam kī ban sakūñ
firdaus-e-ārzū mire dil kī kalī bhī hai

maiñ ḳhud hī ḳhūgar-e-ḳhalish-e-justujū na thā
dushvār varna marhala-e-ārzū na thā

sukūn-e-sīna-e-tūfāñ 'mujīb' kyā shai hai
ye jāniye to na sāhil kī aarzū karte

ye faisla to kiyā dil ne baar baar magar
ik aarzū hī rahī tark-e-ārzū karte

kise ḳhabar hai ki dil ke kañval khileñ na khileñ
kaTī hai umr bahāroñ kī aarzū karte

safar tamām huā gard-e-justujū bhī ga.ī
tirī talāsh meñ niklī to aarzū bhī ga.ī

ab sub.h-e-nau-bahār kī kyā aarzū kareñ
ik shāḳh-e-āshiyāñ hai so vo bhī jalī huī

ḳhūn-e-jigar se nikhre ḳhad-o-ḳhāl-e-ārzū
dil ke lahū se shāḳh-e-tamannā harī huī

aarzū kī be-hisī kā gar yahī aalam rahā
be-talab aa.egā din aur be-ḳhabar jā.egī raat

jo akaḌ ke shaan se jaa.e hai pyaar se ye batā.e jā
ki bulandiyoñ kī hai aarzū tū diloñ meñ pahle samā.e jā

aarzū ek hī is dil meñ rahī hai raqsāñ
tū koī mere liye shaam suhānī likh de

aarzū dil kī bar aa.ī na 'hasan' vasl meñ aur
lazzat-e-hijr ko bhī muft meñ kho baiThe ham

har ik darīcha kiran kiran hai jahāñ se guzre jidhar ga.e haiñ
ham ik diyā aarzū kā le kar ba-tarz-e-shams-o-qamar ga.e haiñ

kyā kahūñ dil toḌte haiñ kis liye
aarzū shāyad nikālī jā.egī

vo sañvarte haiñ mujhe is kī hai fikr
aarzū kis kī nikālī jā.egī

har saaz kī aarzū takallum
har saaz sukūt-e-pairahan hai

achchhā kiyā ki maiñ ne kiyā tark-e-ārzū
be-sabr dil ko sabr kā maqdūr to huā

hazāroñ rañg the ik aarzū ke
magar mujh ko to us ne ḳhud chunā thā

haañ aarzū to dil meñ kabhī se hai zaḳhm kī
kyā apnā iḳhtiyār kisī kī kamān par