Tags-Aarzoo

baḌī aarzū thī ham ko na.e ḳhvāb dekhne kī
so ab apnī zindagī meñ na.e ḳhvāb bhar rahe haiñ

kuchh naqsh rah ga.e haiñ buzurgoñ kī shaan ke
ab shahr-e-ārzū meñ kisī kā bhī ghar nahīñ

nahīñ qafas se nikalne kī aarzū sayyād
dikhā de ek nazar mere āshiyāne ko

dekho jise vahī hai giraftār-e-ārzū
ab duur is navāh meñ zindāñ se kaun hai

banā.e the jo aarzū ne sāhiloñ pe baiTh kar
tamām ret ke vo ghar bas ek mauj Dhā ga.ī

hazāroñ aarzū dil meñ girah hai
pe kahne kā hameñ yaarā nahīñ hai

us vaqt tak sulagtī rahī us kī aarzū
jab tak dhueñ se saarā badan bhar nahīñ gayā

sanam tere nayan kī aarzū meñ
kabhū sālim kabhī bīmār haiñ ham

ye aarzū mirī barsoñ kī hai ki aap mileñ
farishta ban ke nahīñ ban ke aadmī kī tarah

chāhe tamām zaḳhm do yā do hameñ davā
hai aarzū ye dil ki sadā aap ḳhush raheñ

sau sau tarah likhā to sahī harf-e-ārzū
ik harf-e-ārzū hī mirī intihā hai kyā

na pūchho dil meñ kyā kyā hasrateñ haiñ
tumhārī aarzū hai aur maiñ huuñ

asar us ke ishva-e-nāz kā jo huā vo kis se bayāñ karūñ
mujhe to ajal kī hai aarzū use vahm hai ki ye mar gayā

nuur se bhar puur ho jaatī hai bazm-e-ārzū
jab kabhī vo dekhte haiñ be-hijābāna mujhe

nafas na anjuman-e-ārzū se bāhar khīñch
agar sharāb nahīñ intizār-e-sāġhar khīñch

rahravān-e-jāda-e-ishq-o-fanā mansūr haiñ
ārzū-hā-e-do-ālam un pe qurbāñ kījiye

tumhārī yaad meñ jiine kī aarzū hai abhī
kuchh apnā haal sambhālūñ agar ijāzat ho

ye kahāñ se aa.ī hai surḳh-rū hai har ek jhoñkā lahū lahū
kaTī jis meñ gardan-e-ārzū ye usī chaman kī havā hai kyā

dil meñ apne aarzū sab kuchh hai aur phir kuchh nahīñ
do jahāñ kī justujū sab kuchh hai aur phir kuchh nahīñ

umr-e-darāz maañg ke laa.ī thī chaar din
do aarzū meñ kaT ga.e do intizār meñ