Tags-Aarzoo

har marg-e-ārzū kā nishāñ der tak rahā
jab sham.a gul huī to dhuāñ der tak rahā

naḳhl-e-umīd-o-ārzū be-barg-o-bār hai
nākāmī-e-hayāt pe dil sharmsār hai

husn-e-kul kā ārzū-mand is tunuk-jānī meñ huuñ
mere qad se jo bahut ūñchā hai us paanī meñ huuñ

nā-umīdī baḌh ga.ī hai is qadar
aarzū kī aarzū hone lagī

jaane kyā ho kar nigāhoñ se ishāra rah gayā
haa.e ḳhūn-e-ārzū jab hal ke pardā rah gayā

aarzū se baḌh ke dushman koī insāñ kā nahīñ
jis qadar mumkin ho 'bismil' aarzū kam kījiye

har zabāñ par hai guftugū terī
hai har ik dil meñ aarzū terī

isī ke haiñ sabab se sab ye hijr kī sa.ūbateñ
kahāñ se aa ga.ī hamāre darmiyān aarzū

tū chashm hī meñ rah agar pasand hai kushādgī
ki dil hai tañg aur is meñ yak jahān aarzū

zarā sā haath kyā lagā habāb sā bikhar gayā
jise samajh rahī thī ek āsmān aarzū

shajar hajar zamīn āsmān sab ko zo.af hai
magar ye ik javān kī rahī javān aarzū

phirā ke dīda-e-tapāñ meñ mom ke mujassame
kahāñ kahāñ karegī diid kā ziyān aarzū

ilāhī ḳhair itne sin pe āñdhiyoñ kī dostī
abhī to siikh paa.ī bhī nahīñ uḌaan aarzū

talaf karegī kab tak aarzū kī jaan aarzū
taḌap rahī hai har taraf lahūluhān aarzū

tū āftāb hai maiñ gul duā tire sukūn kī
kisī kī shaan qahr hai kisī kī shaan aarzū

jāneñ musāfirān-e-rah-e-ārzū hameñ
haiñ sañg-e-mīl raah kī dīvār ham nahīñ

is tarah manzil-e-ārzū kaT ga.ī is tarah ye ghanī tīrgī chhaT ga.ī
apne paañv pe yaaro ḳharāsheñ to kyā apne chehre pe gard-e-safar bhī na thī

un ko ye aarzū are tauba
maiñ kahūñ aarzū bharā huuñ maiñ

sāñsoñ kī jal-tarañg par naġhma-e-ishq gaa.e jā
ai mirī jān-e-ārzū tū yūñhī muskurā.e jā

tumhārī aarzū hone se pahle bhī to ham the
guzāra ho rahā thā so guzāra ho rahā hai