Tags-Aarzoo

'faiz' takmīl-e-ārzū mālūm
ho sake to yūñhī basar kar de

aa ġham-e-zindagī kahāñ hai tū
aarzū le rahī hai añgḌā.ī

aarzū mutma.in to ho jaatī
aur bhī kuchh sitam kiye hote

kabhī jāda-e-talab se jo phirā huuñ dil-shikasta
tirī aarzū ne hañs kar vahīñ Daal dī haiñ bāñheñ

aarzū rakh use paane kī koī roz abhī
phir yahīñ bām-e-tamannā se utar jā.egā tū

ik pal meñ dekh terī tasvīr ban ga.ī jab
kisī aarzū meñ lā kar thoḌā malāl Daalā

vahī nā-sabūrī-e-ārzū vahī naqsh-e-pā vahī jaada hai
koī sañg-e-rah ko ḳhabar karo usī āstāñ kā irāda hai

bahut qarīb na aao yaqīñ nahīñ hogā
ye aarzū bhī agar kāmyāb ho jaa.e

bujhī bujhī sī rahe sham-e-ārzū sar-e-bazm
so raushnī ke liye dil jalā diyā ham ne

zamīn-e-shor lagī dasht-e-ārzū meñ jahāñ
vahīñ pe ishq kā paudā lagā diyā ham ne

rahī na tāqat-e-guftār aur agar ho bhī
to kis umiid pe kahiye ki aarzū kyā hai

ummīd hai javāb-e-ġham-e-ārzū magar
vo kyā kare jise koī ummīd hī nahīñ

zindagī ko na hai aarzū ko 'vafā' hasrat-āgīñ hai donoñ kā shahr-e-vafā
zindagī aarzū meñ guzar jā.egī aarzū dil meñ ghuT ghuT ke mar jā.egī

khaḌā huuñ dhuup meñ saa.e kī justujū bhī nahīñ
ye kyā sitam hai ki ab terī aarzū bhī nahīñ

ye aarzū hai ki vo din na dekhnā ho nasīb
mire amal se mirā fikr jab ḳhafā hogā

maiñ ne apnī palkoñ par ġham-kade sajā.e haiñ
aarzū ke mātam meñ sogvār hastī hai

mar miTe ham na ho sakī puurī
aarzū tum se ek bhī dil kī

aarzū hī to zindagī hai yahāñ
zindagī hai to aarzū kiije

mujhe bulātā hai phir vahī shahr-e-nā-murādī
ki aarzū ābloñ meñ tasvīr dekhtī hai

kis aarzū meñ uThe kis tarah chale 'anjum'
is aadhī raat meñ ab kis kā dar khulā hogā