Tags-Aarzoo

aap se sharh-e-ārzū to kareñ
aap taklīf-e-guftugū to kareñ

har aarzū ko apnī nihāyat kī fikr thī
bāzār-e-shauq hashr ke maidāñ se kam na thā

us kī chashm-e-karam thī hayāt-āfrīñ ḳhushk pattoñ pe jaise nikhār aa gayā
aarzū ke shagūfe mahakne lage dil kī be-chainiyoñ ko qarār aa gayā

aarzū aur zamāne kī kashākash se gurez
zindagī aur charāġh-e-tah-e-dāmāñ kī tarah

falak ko hai aarzū ki jhuk kar maiñ apne taare karūñ nichhāvar
huī hai makka kī sar-zamīñ pe ye aaj kis mah-laqā kī aamad

aarzū kī be-hisī kā gar yahī aalam rahā
be-talab aa.egā din aur be-ḳhabar jā.egī raat

tujh se sau baar mil chuke lekin
tujh se milne kī aarzū hai vahī

jo ho puurī vo aarzū hī nahīñ
jo na puurī ho aarzū hai vahī

aaj tak dil kī aarzū hai vahī
phuul murjhā gayā hai bū hai vahī

fareb-e-ārzū ab to na de ai marg-e-mayūsī
ham ummīdoñ kī ik duniyā luTā kar lauT aa.e haiñ

ye aarzū hai kabhī maiñ bhī khiḌkiyāñ kholūñ
magar galī kī havā mere ghar ko raas to ho

ye sharāb zer-e-hasīñ-ghaTā jo hai 'kaif' nāzish-e-mai-kada
kisī tishna-kām kī aarzū kisī tishna-lab kī duā na ho

na aarzū se khulā hai na justujū se khulā
ye husn-e-rāz jo har shai meñ kār-farmā hai

dil meñ ik aarzū hai barsoñ se
lafz ban kar adā nahīñ hotī

maiñ sirf ek ḳhalā thii, jahāñ fazā na havā
jab aarzū kā parinda uḌaan tak pahuñchā

aarzū ḳhaak meñ dushman kī mile
is liye dafn kiyā thā ta.avīz

saaz ḳhāmosh aarzū bīmār
koī naġhma nahīñ hai tāroñ meñ

ki jo banāne kī aarzū meñ bigāḌte haiñ
vo haath hī bebasī ke pinjre meñ band haiñ

kabhī ḳhauf thā tire hijr kā kabhī aarzū ke zavāl kā
rahā hijr-o-vasl ke darmiyāñ tujhe kho sakā na maiñ pā sakā

mujhe ye milā hai mujhe vo milā hai mujhe sab milā hai magar ye gila hai
maiñ kyā māñgtā thā ye kyā mil gayā hai ki sab mil gayā hai tirī aarzū meñ