Tags-Aah

zindagī apnī kisī tarah basar karnā hai
kyā karūñ aah agar terī tamannā na karūñ

vo ḳhafā jo ham se hai ġhuncha-lab to hamārī shakl ye hai ki ab
kabhī rañj-e-dil kabhī āh-e-jāñ kabhī chashm-e-ġham se pur-āb hai

bakheḌā yaañ kā yaañ par chhoḌ 'afrīdī' adam āḳhir
na ye dard-o-balā rañj-o-alam āh-o-fuġhāñ le jā

aah kyā kyā āj-kal rañgīniyāñ dehlī meñ haiñ
rāstoñ par chaltī-phirtī bijliyāñ dehlī meñ haiñ

mirī fariyād sun kar kuchh unheñ parvā nahīñ hotī
niDar baiThe haiñ āh-e-nā-rasā ke jānñe vaale

abhī se aañkh meñ aañsū haiñ lab par aah dil meñ dard
ye āġhāz-e-mohabbat hai to phir anjām kyā hogā

huā na mujh ko ḳhumār āḳhir un sharāboñ kā
'nazīr' aah isī roz ko maiñ rotā thā

nahāne jaate to phir aah kartī chhīñToñ se
vo ġhote detā thā aur maiñ use Dubotā thā

nāseh ne mere haq meñ kahā ahl-e-bazm se
bigḌī huī ko aah kahāñ tak sañvāriye

adab gar hazrat-e-jibrīl kā maan.e na ho mujh ko
to shāḳh-e-sidra se mere ye āh-e-nā-tavāñ lipTe

ziist ko dars-e-ajal detī hai jis kī bārgāh
qahqaha ban kar nikaltī hai jahāñ har ek aah

ab to vīrāñ kiye jaate ho tarab-ḳhāna-e-dil
aah kyā jaane kab aa phir ise ābād karo

ye āh-e-be-asar kyā ho ye naḳhl-e-be-samar kyā ho
na ho jab dard hī yārab to dil kyā ho jigar kyā ho

agarche āh-e-sar-e-shām bhī zarūrī hai
dil-e-sitam-zada ārām bhī zarūrī hai

likhne ke vāste koī unvān chāhiye
fariyād-o-āh-o-ashk-fishānī likhā karo

idhar se bhī hai sivā kuchh udhar kī majbūrī
ki ham ne aah to kī un se aah bhī na huī

jī meñ Thānā thā ki ham hijr meñ jiine ke nahīñ
mar ga.e aah ye baat ham se nibāhī na ga.ī

dil kī vāshud pe abas aah ne khīñchī taklīf
kholne uqde to ġhunchoñ ke sabā hī jaane

lo vaqt huā raat kā aur aah nadārad
bijlī abhī aa.ī thī abhī vaah nadārad

shikāyat kī bhī ab tāqat kahāñ hai
nigāh-e-hasrat āh-e-nā-tavāñ hai