Tags-Aah

kab pahuñchī aah zo.af se gosh-e-butāñ talak
sau jā Thahar ke siine se aa.ī zabāñ talak

is darja fart-e-zo.af se ham pīchhe rah ga.e
pahuñchī na aah bhī jaras-e-kārvāñ talak

na vo nāloñ kī shorish hai na ġhul hai āh-o-zārī kā
vo ab pahlā sā hañgāma nahīñ hai be-qarārī kā

soch kar āh-e-dard kuuñ ārām
dil hamārā huā daras kā gadā

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

aah is bahr meñ habāb kī tarah
apnī bhī zindagī hai koī dam

huī shakl apnī ye ham-nashīñ jo sanam ko ham se hijāb hai
kabhī ashk hai kabhī aah hai kabhī rañj hai kabhī taab hai

kahīñ aah ban ke lab par tirā naam aa na jaa.e
tujhe bevafā kahūñ maiñ vo maqām aa na jaa.e

ab tap-e-furqat se ye kuchh zof taarī hai ki aah
dañg rah jaatī hai ham ko nā-tavānī dekh kar

chale hī jā.egī kyā dard kī kaTārī bhalā
rahegī saath kahāñ tak ye āh-o-zārī bhalā

nāla-e-mauzūñ se misra.a aah kā chaspāñ huā
zor ye pur-dard apnā matl.a-e-dīvāñ huā

aah kyā kiije zulf o ruḳh us kā
chit chaḌhā hī rahe hai lail o nahār

aah aur naale ke girdā-gird dil
phirte haiñ rātoñ ko rakhvāle paḌe

ātish-e-ishq ko siine meñ abas bhaḌkāyā
ab bhalā khīñchūñ huuñ maiñ āh-e-sharar-bār ki tū

detā hai terī qāmat-e-dil-jū kā jo patā
be-sāḳhta vo khīñchtā ik dil se aah hai

vo dil rakhte haiñ apnā paas apne balki ġhairoñ kā
haqīqat be-diloñ kī aah dil-dāroñ se mat pūchho

guloñ ko kab ḳhabar hai hāl-e-zār-e-andalīboñ se
haqīqat muflisoñ kī aah zar-dāroñ se mat pūchho

ġham baḌhne de ai dil aur zarā jāñch aah kī be-tāsīr na kar
hai ḳhvāb adhūrā aap abhī be-samjhe ġhalat ta.abīr na kar

aah kī taqsīr nahīñ hai magar
be-asarī ne mujhe rusvā kiyā

yuuñ kānoñ-kān gul ne na jaanā chaman meñ aah
sar ko paTak ke ham pas-e-dīvār mar ga.e