Tags-Aah

fazā meñ dard-āgīñ giit lahrā.e to aa jaanā
sukūt-e-shab meñ koī aah tharrā.e to aa jaanā

kaise betāb un ko dekhūñgā
aah yārab rasā na ho jaa.e

uf ye nādārī mire siine se uThtā hai dhuāñ
aah ai aflās ke maare hue hindostāñ!

baaġh terā kyuuñ jahannam kā namūna ho gayā
aah kyuuñ terā bharā darbār suunā ho gayā

nāznīnoñ kā ye aalam māthar-e-hind aah aah
kis ke jaur-e-nā-ravā ne kar diyā tujh ko tabāh?

ik aah jo sho.ala-bār huī aalam meñ sharāre phail ga.e
ik mauj jo muztar ho ke uThī dariyā kā lahū garmā hī ga.ī

kuhistāñ meñ mārūñ agar aah kā dam
fakānat jibālun kasīban mahīlā

kuchh to de ai falak-e-nā-insāf
aah o fariyād kī ruḳhsat hī sahī

girya o āh-o-fuġhāñ naala o yā rab fariyād
sab ko hai har shab-o-roz apne asar kā takiya

vasl kī shab bhī maiñ na soyā aah
roz-e-hijr un ke ḳhauf kā maarā

aah vo kaun thā ḳhudā maarā
jis ne us se mujhe lagā maarā

us shoḳh ne nigāh na kī ham bhī chup rahe
ham ne bhī aah aah na kī ham bhī chup rahe

paañv paḌte hī ġharaz us ustuḳhāñ ne aah kī
aur kahā ġhāfil kabhī to ham bhī sāhab jaan the

vaah re qismat ki vo mere muqaddar meñ paḌā
aah ne jo bal nikālā charḳh-e-kaj-raftār kā

khīñchī jo merī tarah se qumrī ne āh-e-sard
jaaḌe ke maare sarv chaman meñ akaḌ gayā

ro.e ba-rañg-e-abr farishte bhī gūñdh kar
kis dasht-e-ashk-o-āh kī miTTī se ham bane

tirī yaad meñ bahut hīla-jū yūñhī guzre shām-o-sahar mire
kabhī din meñ aah se kaam thā kabhī shab meñ nauhagarī rahī

maza to jab hai ki ai āh-e-nā-rasā ham se
vo ḳhud kahe ki batā terī aarzū kyā hai

rakhā kar haath dil par aah karte
nahīñ rahtā charāġh aisī pavan meñ