Tags-Aah

mar jaa.eñ qafas meñ yuuñ hī ham aah taḌap kar
itnī jo ḳhabar lene ko sayyād na hove

ai aah zarā uThiyo to āhista ki vo jo
thoḌā sā asar hai kahīñ barbād na hove

tire ḳhulūs-e-nihāñ kā to aah kyā kahnā
sulūk uchaTTe bhī dil meñ samā.e haiñ kyā kyā

afsurdagī-e-dil gul-e-tar ho ke rahegī
āh-e-saharī bād-e-sahar ho ke rahegī

kaun sā dil hai vo ki jis meñ aah
ḳhāna-ābād tū ne ghar na kiyā

ham ne kis raat naala sar na kiyā
par use aah kuchh asar na kiyā

vo din ga.e jo karte the ham muttasil fuġhāñ
ab āh-e-nā-tavān kabhī hai kabhī nahīñ

kyūñkar karūñ zabt-e-āh qātil
ghāyal se pukār kyūñke jaave

ilāhī falak jis se phaT jaa.e de
vo tāsīr āh-e-jigar-tāb meñ

yahī hai ab aarzū 'tabassum' ki dam nikal jaa.e aah karte
ki tāb-e-iz.hār-e-ulfat-e-yār sheva-e-āshnā nahīñ hai

in do ke sivā koī falak se na huā paar
yā tiir mirī aah kā yā us kī nazar kā

ai aah us ke dil meñ tāsīr ho to jānūñ
hai varna kaam kitnā patthar gudāz karnā

usī se duur rahā asal mudda.ā jo thā
ga.ī ye umr-e-azīz aah rā.egāñ merī

ba-rañg-e-saut-e-jaras tujh se duur huuñ tanhā
ḳhabar nahīñ hai tujhe aah kārvāñ merī

milegā kyā tujhe sayyād mujh ko be-zabāñ kar ke
sukūn-e-qalb miltā hai mujhe āh-o-fuġhāñ kar ke

āh-e-sozāñ o ashk-e-gul-gūñ se
kār-e-barq-o-sahāb kartā huuñ

ye āh-e-parda-dar aisī huī adū merī
habāb ho ga.ī āḳhir ko aabrū merī

ishq meñ tere gul khā kar jaañ apnī dī hai 'nasīr' ne aah
us ke sar-e-marqad par gul-rū lā koī duunā phūloñ kā

chipke tak rahte haiñ rañg us kā bhabūkā sā ham
aah par dil kī lagī apnī bujhā sakte nahīñ

takte haiñ us qad o ruḳhsār ko hasrat se aur aah
bheñch kar ḳhuub sā chhātī se lagā sakte nahīñ