Tags-Aah

ik āh-e-sard ban kar rah ga.e haiñ
vo biite din vo yārāne purāne

tum to ai mehrbān anūThe nikle
jab aan ke paas baiThe rūThe nikle

ishq vo hai jis ke hāthoñ qumrī o bulbul ke aah
zer-e-sarv-o-gul paḌe haiñ bāl-o-par donoñ taraf

yahāñ dam khīñchnā do dopahar mushkil hai ho jaatā
dhuāñ ghaTtā hai jab siine meñ apnī āh-e-sozāñ kā

ab kaheñ kyā us se hamdam dil lagāte vaqt-e-āh
thā jo kuchh kahnā so vo to ham ne pahle kah diyā

aah ye rañgīn mausam ḳhuun kī barsāt kā
chhā rahā hai aql par jazbāt kī halchal kā rañg

āh-e-sahar ne sozish-e-dil ko miTā diyā
is baad ne hameñ to diyā sā bujhā diyā

samjhā hai asar koī balā aah ko merī
Dartā hai vo gardūñ se utartā hī nahīñ hai

yā mirī aah meñ hī koī sharar zinda nahīñ
yā zarā nam abhī tere ḳhas-o-ḳhāshāk meñ hai

vahī aah asl meñ aah hai vahī naala asl meñ naala hai
ki idhar jo dil se nikal paḌe to udhar falak meñ ho thartharī

kyuuñ na ho.e dil-e-yāqūt-labāñ mom 'sirāj'
kaam kartā hai mirī aah kā hiirā khan meñ

na dil se aah na lab se sadā nikaltī hai
magar ye baat baḌī duur jā nikaltī hai

kuchh aisā ehtirām-e-dard-e-ulfat hai mire dil ko
ḳhamoshī hukmarāñ hai aah o fariyād o fuġhāñ kaisī

āh-o-nāla na karūñ aur na fariyād karūñ
sochtā huuñ maiñ unheñ kis tarah ab yaad karūñ

sarsabz nit rakheñge unheñ mere ashk o aah
ai nau-bahār-e-husn jo chāhe chaman lagā

ho gayā Dher vahīñ aah bhī niklī na koī
jaane kyā baat kahī sham.a ne parvāne se

āshiyāna jal gayā zulm-o-jafā-o-jaur kā
merī āh-e-ātishīñ ke 'barq' ban jaane ke ba.ad

ai aah agar chhoḌ duuñ maiñ zabt kā dāman
uḌne lage ḳhāk-e-ruḳh-e-sahrā mire aage

aah ai murġh-e-chaman kuchh tū bhī vāqif hai ki sub.h
gul ne kyā pūchhā thā hañs kar bāġhbāñ ne kyā kahā

bāġhbāñ Tuk to baiThne de kahīñ
aah gum-karda āshiyāñ haiñ ham