Tags-Aah

mubārak nāla-e-mazlūm vo zālim pukār uTThā
are ab terī āh-e-ātishīñ jiine nahīñ detī

aah kab tak maiñ bakūñ terī balā suntī hai
bāteñ logoñ kī jo kuchh dil mujhe sunvātā hai

dil meñ us shoḳh ke na kī tāsīr
aah ne aah nā-rasā.ī kī

tire ishq meñ kyuuñ na maiñ dil ko ro.uuñ jigar ke liye kyuuñ na maiñ aah khīñchūñ
shab-o-roz kī muḳhtalif āfatoñ ne ise kar diyā chit use kar diyā paT

udhar vo bhī sargarm-e-zulm-o-jafā hai idhar ham bhī masrūf-e-āh-o-bukā haiñ
kahīñ baḌhte baḌhte na baḌh jaa.e jhagḌā kahīñ hote hote na ho jaa.e khaTpaT

chhuriyāñ chalīñ shab dil o jigar par
la.anat hai is āh-e-be-asar par

ham sarv-e-chaman dil kī har ik aah ko samjhe
apnā qad-e-mauzūñ na dikhāyā to huā kyā

lab talak bhī aa nahīñ sakte haiñ maare zo.af ke
aah fauj-e-ġham ke jo jaane havaldāroñ meñ the

nāla-o-āh-o-fuġhāñ dard-o-alam soz-o-gudāz
aah kaise kaise 'joshish' apne ġham-ḳhvāroñ meñ the

āh-e-girya saath hoñ ġhurbat meñ jab aatā hai dhyān
bekasī kahtī hai ye āb-o-havā ke haath hai

ashk nigal jā.ūñ to yaqīnan shiddat-e-ġham ho jaa.e kam
dil kā jhulas jaanā lāzim hai aah jo lab par aa.e kam

mire ḳhayāl se bhī aah mujh ko buad rahā
hazār tarah se chāhā barābarī na huī

idhar se bhī hai sivā kuchh udhar kī majbūrī
ki ham ne aah to kī un se aah bhī na huī

misl-e-nai ham ne to fariyād bahut kī lekin
koī hamdam na huā aah hamārā apnā

pattharoñ ke kaleje phaTne lage
sub.h-dam aah bhar rahā hai kaun

jo dil kā raaz be-āh-o-fuġhāñ kahnā hī paḌtā hai
to phir apne qafas ko āshiyāñ kahnā hī paḌtā hai

agar kho gayā ik nasheman to kyā ġham
maqāmāt-e-āh-o-fuġhāñ aur bhī haiñ

ab vo mauqūf huā nāma-o-paiġhām bhī aah
harf ġhairoñ kā asar kar hī gayā tujh ko kyā