Tags-Aah

tujh binā dil ko be-qarārī hai
dam-ba-dam mujh ko āh-o-zārī hai

aah kuuñ dil meñ maiñ chhupātā huuñ
lāzim-e-ishq parda-dārī hai

be-shaġhl na zindagī basar kar
gar ashk nahīñ to aah sar kar

jazb-o-asar se ban gayā aur bhī dushman āsmāñ
kar diyā rāz-e-dil ayaañ āh-e-rasā ko kyā huā

sub.h har roz isī ġham meñ hameñ hotī hai shaam
aah jāgeñge mire kaun sī ab raat nasīb

har dāstān-e-ġham hai mirī dāstāñ se duur
jaise ki koī qais ho āh-o-fuġhāñ se duur

ham haiñ ranjūr apne ashk-o-āh se
hai burī āb-o-havā bīmār haiñ

dil pe jo guzre hai mere aah maiñ kis se kahūñ
kyā karūñ maiñ ai mire allāh maiñ kis se kahūñ

ain fasl-e-gul meñ hī sayyād-e-be-parvā ne aah
das ke par katre to kiiñ āñkhoñ meñ das kī tīliyāñ

na pūchho dil kī haqīqat tumhāre ishq meñ aah
use vo ġham jo lagā hai usī meñ galtā hai

ḳhūbāñ ke to ham fidvī o banda bhī kahā.e
lekin vo hamāre na hue par na hue aah

kahte haiñ ki niklā hai vo ab sair-e-chaman ko
kyā vaqt hai is vaqt mire par na hue aah

dekh us ko 'nazīr' ab mujhe aatā hai yahī rashk
kyuuñ ham bhī usī tarah ke dilbar na hue aah

jaise ki dil un lāla-azāroñ ke haiñ sañgīñ
dil chāhne vāloñ ke bhī patthar na hue aah

dariyā bhī bahe mai ke par ai bāda-parastāñ
ye ḳhushk vo lab haiñ ki kabhī tar na hue aah

dāmān-o-kanār ashk se kab tar na hue aah
do chaar bhī aañsū mire gauhar na hue aah

kyā naqs hai us ġhairat-e-ḳhurshīd ke aage
ham la.al to kab hote haiñ aḳhgar na hue aah

kyā tafraqa hai jab ki ga.e ham to na thā vo
aur aayā vo ham paas to ham ghar na hue aah

mire paas jo bhī thā luT gayā na vo maiñ rahā na vo dil rahā
kisī aur shai kā to zikr kyā ki ab aah meñ bhī asar nahīñ

nāla-o-āh kī tafsīl na pūchho mujh suuñ
daftar-e-dard basā ishq ke dīvān meñ aa