Tags-Aahat

raat bhar pichhlī sī aahaT kaan meñ aatī rahī
jhāñk kar dekhā galī meñ koī bhī aayā na thā

un ke jaate hī ye ho jaatī hai hālat apnī
kaan aahaT pe lage dar pe nazar hotī hai

aahaT bhī agar kī to tah-e-zāt nahīñ kī
lafzoñ ne ka.ī din se koī baat nahīñ kī

kivāḌ band kahāñ muntazir the aahaT ke
lagī jo der to dahlīz tak safar meñ lagī

har ik aahaT par tire aane kā hotā thā gumāñ
ḳhaak meñ sab mil ga.iiñ haiñ vo hama-tan-goshiyāñ

sahn meñ aahaT hai koī aur na chhat par chaap hai
shaam hai aur be-dilī kī sīḌhiyoñ par maiñ akelā

sunā.ī detī nahīñ hai ab apnī aahaT bhī
ravāñ huā hai har ik samt shor andar kā

shahr-panāh kī dīvāroñ par ik duzdāna aahaT hai
aur maiñ us ko dekh rahā huuñ shahr to saarā niiñd meñ hai

qayāmat na uTThe ki uTThe jahāñ meñ magar bil-yaqīñ maiñ to uTThūñgā jhaT-paT
tah-e-qabr jis vaqt mujh ko milegī sar-e-qabr kuchh un ke qadmoñ kī aahaT

koī halchal hai na aahaT na sadā hai koī
dil kī dahlīz pe chup-chāp khaḌā hai koī

har lahza us ke paañv kī aahaT pe kaan rakh
darvāze tak jo aayā hai andar bhī aa.egā

shaam hote hī jo dahlīz pe aahaT sī huī
mere āñgan se ka.ī ḳhvāb suhāne nikle

safīr-e-sub.h kī aahaT pe ho ga.ī bedār
ġhunūdgī meñ jo ḳhvābīda shab-ḳhumārī thī

aahaT aahaT pe gumāñ guzre hai vo aa pahuñche
dil-e-nādāñ ke bahalne kā tarīqa niklā

kisī samt se us kī aahaT na aa.ī
bahut der tak raat ke sard-ḳhāne meñ

na kisī paañv kī aahaT na koī naqsh-e-qadam
qāfile ruuh ke yuuñ kūcha-e-tan se guzre

terī aahaT sunte hī maiñ
kachchī niiñd se chauñk uThā thā

kuchh aa chalī hai aahaT us pā-e-nāz kī sī
tujh par ḳhudā kī rahmat ai dil zarā Thaharnā

har ik aahaT tirī aamad kā dhoka
kabhī to laaj rakh le is ḳhatā kī

komal pad-gaminī kī aahaT to suno
gaate qadmoñ kī gungunāhaT to suno