Tags-Aahat

koī dastak koī aahaT na sadā hai koī
duur tak ruuh meñ phailā huā sannāTā hai

phir ek aas kī chilman se umr bhar lag ke
ḳhud apne paañv kī aahaT kā intizār karūñ

dil dhaḌak uThtā hai ḳhud apnī hī har aahaT par
ab qadam manzil-e-jānāñ se bahut duur nahīñ

aahaT pe saañs kī tirī aamad kā hai gumāñ
hañgāma-e-hayāt bhī ḳhāmosh-tar hai aaj

jab pahle-pahal ehsās huā hai ġham kā to dil aisā kāñpā
jaise ki dulhan pahlī shab kī aahaT jo mile tharrā jaa.e

biite ḳhvāb kī aadī āñkheñ kaun unheñ samjhā.e
har aahaT par dil yuuñ dhaḌke jaise tum ho aa.e

barsoñ kā bachhḌā huā saaya
ab aahaT le kar lauTā hai

ek ik saañs pe dhokā hai kisī aahaT kā
ek ik ghaav ujāloñ kī zabāñ hai ab ke

shaam Dhale aahaT kī kirneñ phūTī thiiñ
sūraj Duub ke mere ghar meñ niklā thā

hai dhyān lagā dar kī taraf par ka.ī din se
kānoñ meñ tire paañv kī aahaT nahīñ aatī

tū apnī zaat ke har pech-o-ḳham se pūchh ke dekh
qadam qadam mirī aahaT thī kū-ba-kū maiñ thā

aahaT ilaaj hai dil-e-vahshat-pasand kā
rakhā namak zabāñ pe ki nashsha utar gayā

kisī aahaT meñ aahaT ke sivā kuchh bhī nahīñ ab
kisī sūrat meñ sūrat ke sivā kyā rah gayā hai

bichhāyā kamre meñ farsh jhaT-paT durust kī sej kī sajāvaT
sunī jo maiñ ne kisī ke aahaT gumān guzrā ki yaar aayā

dil ke suune sahn meñ gūñjī aahaT kis ke paañv kī
dhūp-bhare sannāTe meñ āvāz sunī hai chhāñv kī

vo yuuñ dil se guzarte haiñ ki aahaT tak nahīñ hotī
vo yuuñ āvāz dete haiñ ki pahchānī nahīñ jaatī

aahaT sī koī aa.e to lagtā hai ki tum ho
saaya koī lahrā.e to lagtā hai ki tum ho

asl meñ thī vo havā.ī aahaT
maiñ baḌī tezī se bāhar aayā

lams aahaT ke havāoñ ke nishāñ kuchh bhī nahīñ
ḳhvāb hī ḳhvāb hai ye shahr yahāñ kuchh bhī nahīñ

kho ga.e ham tirī aahaT pā kar
ya.anī āvāz ko sun kar dekhā