Tags-Aahat

tum the na koī aur thā aahaT na koī chaap
maiñ thī udaas dhuup thī rasta thā aur bas

mire tasavvur ke rāstoñ meñ ubhar ke Duubī hazār aahaT
na jaane shām-e-alam se mil kar kahāñ saverā palaT gayā hai

us ke ghar par bhī vahī shahr-e-ḳhamoshāñ kā samāñ
koī aahaT na sadā chaliye yahāñ se chaliye

koī dastak na koī aahaT thī
muddatoñ vahm ke shikār the ham

Darā huuñ yuuñ kabhī tanhā.iyoñ kī aahaT se
ki jaise mujh meñ koī shai mire sivā bhī hai

shaam Dhale aahaT kī kirneñ phūTī thiiñ
sūraj Duub ke mere ghar meñ niklā thā

tū chale saath to aahaT bhī na aa.e apnī
darmiyāñ ham bhī na hoñ yuuñ tujhe tanhā chāheñ

ai shab-e-ġham koī to aahaT kar
kaaT khā.egā merā ghar mujh ko

ḳhudā ḳhāmosh hai aur ḳhauf-o-ġham se nīm-jāñ insāñ
havā kī lahr ko bhī maut kī aahaT samajhte haiñ

duur tak malgajā sā sannāTā
aur aahaT kabhī kabhī us kī

yā to ab aahaT koī mujh tak pahuñch paatī nahīñ
yā mire andar kā saarā shahr bahrā ho gayā

maslahat kahtī hai vo aa.e to kyuuñ aa.e yahāñ
dil kā ye haal har aahaT pe dhaḌak jaatā hai

kisī ke paañv kī aahaT nahīñ
chūḌiyoñ aur bartanoñ kī khan-khanāhaT bhī nahīñ

unhīñ lamhoñ kī aahaT se milīñ bedāriyāñ mujh ko
mire dariyā kī jaulānī samay ke pāniyoñ se hai

soch ke gumbad meñ ubhrī TūTtī yādoñ kī guuñj
merī aahaT sun ke jaagī saikaḌoñ qadmoñ kī guuñj

zamīñ kī god bhartī hai to qudrat bhī chahaktī hai
na.e pattoñ kī aahaT se bhī shāḳheñ bhiig jaatī haiñ

hotā koī to paañv kī aahaT se chauñktā
jañgal hai kar ke ek sadā aur dekh le

pahle bose kī nīm-garm aahaT
phir rag-e-jāñ meñ rat-jagā.ī hai

shaam kī āḳhirī aahaT pe dahaltā huā dil
sub.h kī pahlī havāoñ meñ bhigoyā huā maiñ

aahaT pe na chauñko ki na aa.egī yahāñ maut
dastak pe na jaao ki ye āvāra huā hai