Tags-Aaina

be-naqāb un kī jafāoñ ko kiyā hai maiñ ne
vaqt ke haath meñ ā.īna diyā hai maiñ ne

log aate the dekhne mujh ko
aise patthar se ā.īna huā maiñ

maiñ ā.īna banūñgā tū patthar uThā.egā
ik din khulī saḌak pe ye naubat bhī aa.egī

apne jauhar se sivā bhī koī qīmat māñge
dil vo ā.īna nahīñ hai ki jo sūrat māñge

garche duniyā hai ā.īna-ḳhāna
merā saanī tirā javāb nahīñ

Takrā ke siyāhī se palaT jaatī hai sūrat
'shāhid' dil-e-ā.īna meñ dīvār sī kyā hai

vahī jo raah kā patthar thā be-tarāsh bhī thā
vo ḳhasta-jāñ hī kabhī ā.īna-qimāsh bhī thā

ek aalam ko tire ishq meñ saktā hogā
saaf ā.īna se shaffāf badan hai kis kā

banā ke ā.īna dekhe hai pahle ā.īna-gar
hunar-var apne hī aib-o-hunar ko dekhte haiñ

jahāñ ke ā.īnoñ se dil kā ā.īna hai judā
is ā.īne meñ ham ā.īna-gar ko dekhte haiñ

ḳhat dekh tere ruḳh uupar āġhāz
ā.īna uupar ġhubār aayā

ahvāl nipaT tañg hai bīmār kā tere
is vaqt tū ai ā.īna-ruḳhsār kidhar hai

kaheñ kis muñh se apnā ā.īna-bardār rahne deñ
tamannā hai ġhulāmī meñ hameñ sarkār rahne deñ

ta.alluq ko na samjho jāvedānī
ye ā.īna havā se TūTtā hai

mujh meñ kisī kā aks na partav ḳhālī ā.īna huuñ maiñ
mere TukḌe kaun sameTe ab TūTūñ yā bikhrūñ maiñ

ḳhvāb meñ kyā kuchh dikhā lā.egā vo ā.īna-rū
niiñd khulte hī magar hairān kar degā mujhe

aks aur ā.īna meñ agar rābta na ho
ye bhī ġhalat anā ke sivā aur kuchh nahīñ

ā.īna husn-e-sabīh bhī kyā dekhe ki vo vaqt-e-nazzāra
dam bhar nahīñ jamte shauq-e-nazar ke paañv phisalte rahte haiñ

tirī har sū tajallī aur merī har taraf nazreñ
tujhe to yaad hogā ā.īna-ḳhāne pe kyā guzrī

patthar to ḳhāmosh paḌe haiñ rāhoñ meñ
ā.īna kyuuñ ā.īne kā dushman hai