Tags-Aaina

ā.īna hī ko kab ta.iiñ dikhlāoge jamāl
bāhar khaḌe haiñ kitne aur ummīd-vār bhī

ā.īna ab nahīñ hai gard-ālūd
ro chukā huuñ nikhar chukā huuñ maiñ

shāna-o-ā.īna kyā ai zulf-e-mushkīn-e-ayāz
terī zīnat ko dil-e-mahmūd honā chāhiye

sub.h jab dhuup ke chashme se nahā kar niklī
ham ne ā.īna badal terā sarāpā dekhā

dushvār ho ga.ī hai ab apnī shanāḳht bhī
ā.īna kah rahā hai ki chehra ajiib hai

hazār rañgoñ meñ apnī lahroñ pe shaam ubhartī hai Dūbtī hai
chahār atrāf ā.īna haiñ vo zulf-e-abtar hai aur maiñ huuñ

maiñ sach se rū-ba-rū ho jā.ūñ kaise
mire kamre meñ ā.īna nahīñ hai

ā.īna ba-har-rāh-guzar ban ga.iiñ āñkheñ
ik umr se baiThe haiñ ki tum sā koī guzre

hisār-e-ā.īna-o-ḳhvāb se nikalne tak
shikast-e-zāt kā manzar sambhāl ke rakhnā

ā.īne meñ muñh dekh ke maġhrūr hue aap
do shakloñ se kaisā ye natīja nikal aayā

masāf-e-razm se hargiz na jā ā.īna-ḳhānoñ meñ
ḳhudā kā sher-dil āfāt ke qālib meñ Dhaltā hai

vo merī parchhā.īñ hai yā maiñ us kā ā.īna huuñ
mere hī ghar meñ rahtā hai mujh jaisā hī jaane kaun

misāl-e-aks kunj-e-zāt se bāhar rahā huuñ maiñ
ki āp-apne muqābil ā.īna ban kar rahā huuñ maiñ

kahtā hai ye ā.īna mujhe nazreñ churā kar
nam-dīda mujhe dekh ke mat aise hañsā kar

dil ke TukḌoñ ko kahāñ joḌ sakā hai koī
phir bhī āvāza-e-ā.īna-girāñ kheñchtā hai

turra-e-kākul-e-pechāñ ruḳh-e-nūrānī par
chashma-e-ā.īna meñ saañp sā lahrātā hai

kaam kyā degā vo TuuTā huā ā.īna bhī
yaad rakhne ko vahī aks vo chehrā hī na ho

kabhī na mujh ko Darā.egā mere bātin se
ye ahd kar ke mirā ā.īna mukar bhī gayā

paḌegā tere jī meñ shak na sun ġhammāz kī bāteñ
hazār ā.īna ho dil par kudūrat aa hī jaatī hai

burīda aks larzāñ haiñ lahū kī vahshatoñ meñ
ye kaisā ā.īna-ḳhāna sajā rakkhā hai tum ne