Tags-Deedar

va.ada na karo jalva-e-dīdār dikhāo
imroz ke mushtāq ko fardā se ġharaz kyā

dil jo dīdār kā qātil ke bahut bhūkā thā
us sitam-kushta se ik zaḳhm bhī khāyā na gayā

be-ḳhudī ne mujhe dīdār dikhāyā terā
tujh ko paayā to magar aap ko kho kar paayā

kis tarah tujh se kaheñ kitnā bhalā lagtā hai
tujh ko dekheñ tire dīdār meñ gum ho jaa.eñ

tū hai aur ġhair ke ghar jalva-tarāzī kī havas
ham haiñ aur hasrat-e-dīdār tire kūche meñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

vo apne va.ada-e-dīdār se phirne ko phir jaa.eñ
magar ye to samajh leñ bevafā kis kā laqab hogā

jā na tū hasrat-e-dīdār abhī baaqī hai
ik ramaq mujh meñ dam-e-yār abhī baaqī hai

ik qayāmat hai ibārat vāda-e-dīdār kī
din guzarte jā.eñge maanī badalte jā.eñge

ser hotā hī nahīñ zauq-e-tamāshā lekin
mujh se kahtī hai mirī jur.at-e-dīdār ki bas

maiñ us ke dīdār se kab sairāb huā
vo to bas dāman ko bhigone aayā thā

hai ḳhabar aaj to qātil haiñ adā.eñ un kī
jaan le saktā hai dīdār kareñ bhī ki nahīñ

haa.il hai hijāb-e-sharm-o-hayā dīdār to kyā guftār to kyā
mub.ham haiñ ishāre sab us ke inkār to kyā iqrār to kyā

ḳhatm muusā pe kahāñ silsila-e-shauq huā
kitne hī tālib-e-dīdār abhī baaqī haiñ

jis din se dost rakhtā huuñ us ko hijāb-e-husn
apnā hamesha dushman-e-dīdār hī rahā

jigar dil ke varaq haiñ vāda-e-dīdār se raushan
unheñ kyuuñ duuñ kisī ko ye to jannat ke qabāle haiñ

diid ke qābil hasīñ to haiñ bahut
har nazar dīdār ke qābil nahīñ

ishq ke afsāne kyā haiñ sharh-e-husn-e-yār hai
aa.ine go muḳhtalif haiñ ek hī dīdār hai

dīdār kī havas hai na shauq-e-visāl hai
āzād har ḳhayāl se mast-e-ḳhayāl hai