Tags-Deedar

ummīd-vār-e-chāh-e-zanaḳhdān-e-yār huuñ
maiñ tishna-lab huuñ sharbat-e-dīdār kī qasam

ho gayā jaise tirā dīdār pahlā āḳhirī
ho bhī saktā hai kisī kā pyaar pahlā āḳhirī

zauq-e-nazzāra usī kā hai jahāñ meñ tujh ko
dekh kar bhī jo liye hasrat-e-dīdār chalā

zauq-e-dīdār par laakh pābandiyāñ
dekh kar phir unheñ dekhnā jurm hai

andhe shahar ke sab ā.īne andhe haiñ
aise meñ ḳhud apnā bhī dīdār kahāñ

us kī rāhoñ meñ bikhar jaa.e ye ḳhākistar-e-chashm
aur apne liye dīdār kā matlab kyā hai

kaisī ajiib shart hai dīdār ke liye
āñkheñ jo band hoñ to vo jalva dikhā.ī de

shauq-e-dīdār-e-talab hadd-e-adab se jo baḌhā
husn ne tāb-e-nazar chhīn lī jalva ho kar

vaqt-e-dīdār ajab hukm huā
hosh khone kī ijāzat na rahī

ho un kā dīdār qismat se jab bhī adā ho ga.ī hai namāz-e-mohabbat
nikal aa.e jab bhī vo parde se bāhar nigāhoñ ne jhuk jhuk ke sajde sunā.e

aañkh uThā.ī nahīñ vo sāmne sau baar hue
hijr meñ aise farāmush-gar-e-dīdār hue

tumhārā hī mushtāq-e-dīdār hogā
gayā jaan se ik javāñ aate aate

haañ agar maqsūd ho dīdār-e-yār
tab ḳhalā aur fāsla kuchh bhī nahīñ

tū na ho to koī tujh sā hī nazar aa.e 'shahāb'
ham jahāñ hasrat-e-dīdār meñ aa baiThe haiñ

ham hijr meñ jab jaage thī raat bahut 'saifī'
dīdār kā har mausam lamhāt meñ Dhaltā hai

kabhī insāf hai dekhā na dīdār
qayāmat aksar us kū meñ rahā kī

kaleja thaam leñ dīdār-e-jānāñ dekhne vaale
bas ab parda ruḳh-e-rashk-e-mah-e-kāmil se uThtā hai

kyā dil hai agar jalva-gah-e-yār na hove
hai tuur se kyā kaam jo dīdār na hove

maiñ tishna-e-dīdār ki jhoñkā huuñ havā kā
vo jhiil meñ utre hue manzar kī tarah hai

dekh kar mahv-e-jamāl-e-yār āñkheñ ho ga.iiñ
jām-hā-e-sharbat-e-dīdār āñkheñ ho ga.iiñ