Tags-Dhoop

nādān hoshiyār bane jin ke ruup se
vo bhī jhulas ga.e haiñ havādis kī dhuup se

'vājid' use na manzil-e-maqsūd mil sakī
ghabrā ke rah gayā jo masā.ib kī dhuup se

kaisī havā ye aa.ī gulistāñ se garm garm
kyā phuul sho.ale ban ga.e sāvan kī dhuup se

ham-palla hue yaar kī afshāñ se na 'raunaq'
chamkī to bahut kuchh sifat-e-mahr-e-mubīñ dhuup

allāh-re tire garmi-e-āriz kī sharārat
ḳhurshīd chhupā sharm se niklī na kahīñ dhuup

is tarah kī zid hai use har baat meñ mujh se
kahtā huuñ maiñ saaya to vo kahtā hai nahīñ dhuup

hai nūr-e-ruḳh-e-yār zamāne meñ firozāñ
kahte haiñ ġhalat sab ye nahīñ dhuup nahīñ dhuup

hai zer-e-zamīñ saaya to bālā-e-zamīñ dhuup
duniyā bhī do-rañgī hai kahīñ chhāñv kahīñ dhuup

dhuup meñ pahle pighal jaate the log
ab ke kyā guzrī ki patthar ho ga.e

tirī zulfoñ kī ghanī chhāñv bahut duur sahī
jāda-paimā haiñ havādis kī kaḌī dhuup meñ ham

kaam aa.ī hai vahī chhāñv ghanī bhī jo na thī
vaqt kī dhuup meñ jis vaqt maiñ kumhlāyā huuñ

mujhe bahut tez dhuup darkār hai mohabbat ke is safar meñ
kabhī kahīñ sar pe saaya karne koī ghanerā shajar na aa.e

ab tak qadam hī dhuup meñ Thahre haiñ is taraf
tū chhāñv de to dil bhī Thahar jaa.e shahr meñ

din chaḌhe dhuup kī bāteñ nahīñ suntā koī
chāñdnī-rāt pukāre tirā āshiq mujh ko

ḳhvāb-gāhoñ se nikalte hue Darte kyuuñ ho
dhuup itnī to nahīñ hai ki pighal jāoge

bahut thoḌe se dinoñ ke liye
tez dhuup ham se vāpas le lī jaa.e

sab yahāñ baiThe haiñ ThiThure hue jammuñ ko liye
dhuup kī khoj meñ ab koī nikaltā hī nahīñ

dhuup kī bārish meñ rahnā pyaas kī lahroñ ke saath
har sarāb-e-dasht ko tasvīr-e-dariyā dekhnā

ik umr dhuup meñ jo palī thī vo kashmakash
saaya ghane daraḳht kā dekhā to Dar ga.ī

dhuup saat rañgoñ meñ phailtī hai āñkhoñ par
barf jab pighaltī hai us kī narm palkoñ par