Tags-Dil

kyā harj hai jo dil kī bhī sun lo kabhī kabhī
yuuñ apne aap se na hamesha laḌā karo

ai dil-e-'mānī' yūñhī manzil kabhī miltī nahīñ
rāh-e-ulfat meñ diyā karte haiñ nazrāna koī

tū ne kaise soch liyā ki tere tohfe bhuul ga.e
dil ne tere ġham ko pahnā āñkhoñ ko pahnā.ī raat

sāvan aayā lekin sūkhī ehsāshoñ kī hariyālī
banjar dil meñ aañsū bo.e uupar se barsā.ī raat

azā.em shal qavā maflūj dil be-kār ho jaa.e
agar āsāniyāñ hoñ zindagī dushvār ho jaa.e

ināyat kī nazar dil par shah-e-abrār ho jaa.e
mirā tārīk kāshāna tajallī-zār ho jaa.e

vo dil jis ko ḳhayāl-e-mursal-e-muḳhtār ho jaa.e
tajallī-gāh-e-rahmat matla-e-anvār ho jaa.e

siyāsat hai ye dil kī kyā ḳhabar ahl-e-siyāsat ko
ki kyūñ-kar parda-e-inkār meñ iqrār ho jaa.e

yuuñ to sab kuchh bhuul chukā huuñ tark-e-vafā ke ba.ad magar
dard uThā jab dil meñ mere terī nishānī yaad aa.ī

ḳhudā hī jaane ye dil kab ḳhudā kā ghar hogā
abhī to is meñ butān-e-havas kā Derā hai

apne hī dil apnoñ kā dukhāte haiñ bahut
DeḌh iiñT kī masjideñ banāte haiñ bahut

sar chashm sabr dil diiñ tan maal jaan āThoñ
sadqa ka.ī haiñ tum par lo mehrbān āThoñ

yahī to 'kaif' hasad hai ki dil bhī yāroñ ke
siyāh ho ga.e likkhe hue ḳhatoñ kī tarah

sameT kar tire jalvoñ kī raushnī maiñ ne
dil-o-nigāh kī duniyā sañvār lī maiñ ne

uḌaa.e barq o gul-o-lāla ne bahut ḳhāke
magar koī mire dil kā javāb ho na sakā

vaa.e āshiq-e-nādāñ kā.enāt ye terī
ik shikasta shīshe ko dil banā.e baiThā hai

dil ne ġham kā alaav lafzoñ meñ
kis mahārat se aaj Dhālā hai

ā.īna dekh kar na to shīshe ko dekh kar
hairān dil hai aap ke chehre ko dekh kar

judā huī thī vo jab dil pe vaar karne ko
falak pe qaus-e-quzah bhī kamān ho rahī thī

in butoñ ke liye ḳhudā na kare
dīn-o-dil yuuñ koī bhī khotā hai