Tags-Dil

zindagī kis tarah basar hogī
dil nahīñ lag rahā mohabbat meñ

is ujḌe shahr ke āsār tak nahīñ pahuñche
muarriḳhīn dil-e-zār tak nahīñ pahuñche

dil ke ma.abūd jabīnoñ ke ḳhudā.ī se alag
aise aalam meñ ibādat nahīñ hogī ham se

qadam yuuñ be-ḳhatar ho kar na mai-ḳhāne meñ rakh denā
bahut mushkil hai jaan o dil ko nazrāne meñ rakh denā

butoñ ke dil meñ yuuñ shāyad ḳhudā kā ḳhauf paidā ho
ye mere dil ke TukḌe jā ke but-ḳhāne meñ rakh denā

yahāñ ai dil farishtoñ kā bhī zohra aab hotā hai
qadam āsāñ nahīñ ulfat ke vīrāne meñ rakh denā

nazar jis kī taraf kar ke nigāheñ pher lete ho
qayāmat tak phir us dil kī pareshānī nahīñ jaatī

harīm-e-dil meñ Thahar yā sarā-e-jān meñ ruk
ye sab makān haiñ tere kisī makān meñ ruk

ban ban ke bigaḌtī hai mirī baat to dekho
is kūcha-e-dil meñ mirī auqāt to dekho

ye shahr shahr-e-baḳhīlāñ hai ai dil-e-bīmār
yahāñ to zahr bhī miltā nahīñ davā ke liye

jahāñ do dil mohabbat se mile the
vo manzar vo nazāra aañkh meñ hai

nazar kī vus.atoñ se dil kī had tak
tumhārā har ishāra aañkh meñ hai

sar-e-rāh mil ke bichhaḌ ga.e thā bas ek pal kā vo hādsa
mire sehn-e-dil meñ muqīm hai vahī ek lamha azaab kā

uThā ke haath meñ neze pilā ke āb-e-sarāb
kamīn-gāh-e-havas se nishāne dil ke liye

ye kam hai kyā ki mire paas baiThā rahtā hai
vo jab talak mire dil ko dukhā nahīñ jaatā

ruk ke ik ashk ne kyā kyā na jalāyā ham ko
dil kā sūraj bhī charāġh-e-tah-e-dāmāñ niklā

koī dād-e-dil aah kis se kare
har ik hai so us fitna-gar kī taraf

mohabbat ne shāyad ki dī dil ko aag
dhuāñ sā hai kuchh is nagar kī taraf