Tags-Dil

mirā dil bhī ajab ik sāġhar-e-zauq-e-tamannā hai
ki hai ḳhālī kā ḳhālī aur bhartā jā rahā huuñ maiñ

'nushūr' āḳhir kahāñ tak fikr-e-duniyā dil dukhā.egī
ġham-e-hastī ko zauq-e-sher kartā jā rahā huuñ maiñ

mirī nigāh ko ab bhī tirī zarūrat hai
dil-e-tabāh ko ab bhī tirī zarūrat hai

rakhtā huuñ tujh suuñ chashm ye dil ai mah-e-nūr-e-nazar
aa ke ḳhabar ik roz mujh bīmār kī saugand hai

shamshīr-e-abrū bāñdh kar aayā sipāhī nain kā
do Tok dil haiñ āshiqāñ talvār kī saugand hai

tujh hijr meñ dil kī fuġhāñ suuñ aañkh na.iiñ lagtī kabhī
kamḳhvāb hai maḳhmal mirā shab-e-tār kī saugand hai

phir bhī ik lamhe kī fursat jo mayassar aa.e
dil vahīñ chupke se dhaḌkan ko jagā detā hai

aap kyā soch ke ġham apnā atā karte haiñ
himmat-e-dil to ba-qadr-e-ġham-e-duniyā bhī nahīñ

juzv-e-dil ban ke samātī hai mohabbat dil meñ
ye vo kāñTā hai ki hai aur khaTaktā bhī nahīñ

nākām hī dil jo rahnā thā nākām rahā achchhā hī huā
ab kiije kisī kā shikva kyā jo kuchh bhī huā achchhā hī huā

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā

in jaadū karne vāloñ ke kuchh bhed samajh meñ aa to ga.e
dil pyaar ke pīchhe pāgal thā nākām rahā achchhā hī huā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

dil ke kahe se āñkhoñ ne bāzār meñ ik sāmān chunā hai
haath bechārā soch rahā hai jeb bhī ḳhud ko tol rahī hai

na uThūñ dil meñ liye yād-e-sitam hashr ke din
is adā se sar-e-turbat hai pashemāñ koī

ghar kā kyā zikr hai ham dil meñ uThā kar rakh leñ
ham ko mil jaa.e jo chhoTā sā bayābāñ koī

aarsī aa.ina ab donoñ nazar se utre
dil-e-hairāñ hai koī dīda-e-hairāñ koī

dekhā hai aañkh ne tirā jī chāhe pūchh dekh
ai dil maiñ kyā kahūñ mujhe kyā kyā nazar paḌā