Tags-Dil

aañkh kyā Dāliye us gul pe jo kumhlā jaa.e
'kaifī' apnā hī ye dil bāġh-e-iram hai ham ko

butāñ jab ki zulf-e-dotā bāñdhte haiñ
girah meñ dil-e-mubtalā bāñdhte haiñ

har ik taar meñ us ke dil-hā-e-ushshāq
baham jam.a kar ke milā bāñdhte haiñ

tapte dil par yuuñ girtī hai
terī nazar se pyaar kī shabnam

kab mujhe tāla-e-nā-sāz pe ronā aayā
dil-e-nādāñ kī tag-o-tāz pe ronā aayā

aa gayā sāmne anjām taḌap uTThā dil
apne afsāne ke āġhāz pe ronā aayā

chaman vaale jinheñ jān-e-chaman kahte the vo kaliyāñ
mujhe to dāġh-hā-e-dil kī tasvīreñ nazar aa.iiñ

vo insāñ ḳhud-shanāsā-e-rumūz-e-dil nahīñ 'maikash'
ki jis ko zarf-e-rindāna meñ taqsīreñ nazar aa.iiñ

kuchh is andāz se chheḌā nigāh-e-nāz-e-jānāñ ne
ki rah rah kar hamāre dil ke zaḳhmoñ ko hañsī aa.ī

musāfir har koī hotā hai is rāh-e-mohabbat kā
kabhī ham bhī the dīvāne isī dilkash ravānī meñ

tumhāre vasl se Thahregā ye dil-e-be-tāb
baġhair aa.ina sīmāb ko qarār kahāñ

ai bāġh-e-dil ke milansār bāġhbān-e-za.īf
daraḳht dene lage haiñ samar kahāñ ho tum

mire siine se ranj-o-ġham kī tuġhyānī nahīñ jaatī
ilāhī kyā karūñ dil kī pareshānī nahīñ jaatī

tahayyur hai mohabbat ke natā.ej tū ne dekhe haiñ
magar afsos ai dil terī nādānī nahīñ jaatī

kisī aur ġham meñ itnī ḳhalish-e-nihāñ nahīñ hai
ġham-e-dil mire rafīqo ġham-e-rā.egāñ nahīñ hai

koī ham-nafas nahīñ hai koī rāz-dāñ nahīñ hai
faqat ek dil thā ab tak so vo mehrbāñ nahīñ hai

chal nafrat ko chhoḌ ke 'anjum' dil ke rishte joḌ ke 'anjum'
us miTTī kā qarz utāreñ apne vatan kī miTTī hai

nazar se dāman bachā bachā ke maiñ dil ko aarif banā rahā huuñ
tumhāre jalvoñ kī manziloñ meñ nigāh kā e'tibār kyā hai

''aap kī yaad aatī rahī raat bhar''
chāñdnī dil dukhātī rahī raat bhar

bujhīñ sham.eñ to dil jalā.e haiñ
yuuñ añdheroñ meñ raushnī kī hai