Tags-Dil

dil ga.e īmāñ ga.e aqleñ ga.iiñ jāneñ ga.iiñ
tum ne kyā kyā kar dikhāyā ik nigāh-e-nāz se

vo uzr kar ki mire dil ko bhī yaqīñ aa.e
vo giit gā ki jo maiñ ne kabhī sunā hī na ho

sahar ko dil kī taraf ye dhuāñ sā kaisā hai
kahīñ ye merā diyā rāt-bhar jalā hī na ho

apnī rāhoñ meñ to ḳhud bo.e haiñ kāñTe us ne
dushman-e-dil ki nahīñ aur koī dil ke sivā

har ek sajde meñ dil ko tirā ḳhayāl aayā
ye ik gunāh ibādat meñ baar baar huā

raqs-e-bismil kī mire dil ko adā bhī aa.e
mujh se bichhaḌo to taḌapne kā mazā bhī aa.e

dāġh-e-dil ko ḳhāksāroñ ke lagāyā tū ne muñh
ġhuncha-e-tañg-e-dahan meñ gul hai gul meñ ḳhaak hai

yā mukaddar ho ke Duubā hai mirā dil ai parī
yā terī chāh-e-zaqan meñ gul hai gul meñ ḳhaak hai

mere dil meñ daaġh hai har daaġh meñ hai gard-e-ġham
andalībo is chaman meñ gul hai gul meñ ḳhaak hai

raat jab dastakeñ darvāze pe detī hai 'munīr'
kāñpne lagtā hai dil ḳhauf se merā kaisā

vo jis jagah se guzar hamārā rahā thā ik bas tumhārī ḳhātir
hamārā dil ye kahe hai ham se ab us kī galiyoñ meñ jaanā chhoḌo

kyā tamāshā hai ki jab bikne pe raazī ho ye dil
ahl-e-bāzār dukānoñ ko baḌhāne lag jaa.eñ

jo dil ne kah dī hai vo baat an-kahī bhī na thī
ye mauj to tah-e-dariyā kabhī rahī bhī na thī

sunī jo baat koī an-sunī to yaad aayā
vo dil ki jis kī kahānī kabhī kahī bhī na thī

yuuñ to tanhā.ī kā ehsās azal se hai hameñ
kuchh dinoñ se to dil-e-zār bahut tanhā hai

dil-e-mizrāb kī dhaḌkan hai abhī merā vajūd
tū ne vo naġhma sunā kab hai jo nā-paidā hai

mar kar tire ḳhayāl ko Taale hue to haiñ
ham jaan de ke dil ko sambhāle hue to haiñ

be-zār ho na jaa.e kahīñ zindagī se dil
tāsīr se ḳhafā mire naale hue to haiñ

riste haiñ ab ke saal ki bahte haiñ dekhiye
phir fasl-e-gul meñ zaḳhm-e-dil aale hue to haiñ

armāñ jo yuuñ nahīñ to nikalte haiñ kis tarah
yaanī hamāre dil se nikāle hue to haiñ