Tags-Dil

mire dil ke dekho to valvale ki har ek rañg meñ jā milī
jo ghaTe to un kā dahan bane jo baḌhe to arz-o-samā hue

jo tasavvur un kā judā huā dil be-ḳhabar ne ye dī sadā
abhī ham-baġhal the kidhar ga.e abhī god meñ the vo kyā hue

ashk-rezī ke dhaḌalle ne ġhubār
jab zarā bhī dil pe dekhā dho diyā

dil kī parvā tak nahīñ ai be-ḳhudī
kyā kiyā pheñkā kahāñ kis ko diyā

har gul se har ḳhaar se uljhā rahtā hai
dil hai apne yaar se uljhā rahtā hai

dil meñ tire ai nigār kyā hai
hotā nahīñ ham-kanār kyā hai

tā.ūs se chheḌ-chhāḌ kaisī
haañ ai dil-e-dāġh-dār kyā hai

jo jo vo rañj deñ uThāo
jab dil hī diyā to aar kyā hai

maiñ chāhtā huuñ use na chāhūñ
dil par mirā iḳhtiyār kyā hai

mizhgāñ kā hai mire dil meñ khaTkā
ai ḳhushbū-e-nok-e-ḳhār kyā hai

kuchh nigāhoñ se ġham-e-dil kī ḳhabar miltī hai
varna ham vo haiñ ki bātoñ se havā bhī na mile

dil meñ ik dard nihāñ ho to ġhazal hotī hai
sail-e-jazbāt ravāñ ho to ġhazal hotī hai

mere dil meñ jo nihāñ hai vo ġham-e-be-pāyāñ
terī āñkhoñ se ayaañ ho to ġhazal hotī hai

sau baar aa.ī hoñToñ pe jhūTī hañsī magar
ik baar bhī na dil se kabhī muskurā sake

sho.aloñ kī is hamdardī par dil meñ laavā paktā hai
jab saarī bastī phūñkī thī kyuuñ merā ghar chhoḌ diyā

nāla-e-dil par aah kī maiñ ne
baat par baat mujh ko yaad aa.ī

jī pe jis ke sitam kahīñ dekhā
dil kī auqāt mujh ko yaad aa.ī

rahe juuñ shīsha-e-sā.at vo mukaddar donoñ
kabhī mil bhī ga.e do dil jo kudūrat vaale

dil se kuchh kahtā huuñ maiñ mujh se hai kuchh kahtā dil
donoñ ik haal meñ haiñ rañj o musībat vaale

chhoḌ dete haiñ qalam juuñ qalam-e-ātish-bāz
mirī sharh-e-tapish-e-dil kī kitābat vaale