Tags-Dil

dil bhī jigar bhī jaan bhī siina bhī ishq meñ
ye sab makān sadma-o-dard-o-alam ke haiñ

kitāb-e-dil kā mirī ek baab ho tum bhī
tumheñ bhī paḌhtā huuñ maiñ ik nisāb kī sūrat

kyā batā.eñ us ke bin kaise zindagī kar lī
dhaḌkaneñ to zinda haiñ dil ne ḳhud-kushī kar lī

tum bhī is dil ko dukhā lo to koī baat nahīñ
apnā dil aap dukhāyā hai bahut din ham ne

par kahāñ ho sakā jo dil ne mire chāhā thā
maiñ ne rasta vo chunā raas na jo aayā thā

ab ye aalam hai ki jiine ke liye jiitā huuñ
ek afsos o kasak dil meñ liye phirtā huuñ

be-duniyā.ī ne is dil kī aur bhī duniyā-dār kiyā
dil par aisī TuuTī duniyā tark zarā duniyā kī thī

dayār-e-ġhair meñ shām-o-sahar aziyyat hai
dayār-e-dil meñ Thaharnā muhāl mere liye

hazār hāthoñ se maiñ ne jis ko sambhāl rakkhā thā zindagī meñ
charāġh-bar-kaf bisāt-e-dil par khaḌī huī hai vo shaam kahnā

utar gayā dil meñ zahr-e-kākul nisār ik sarv-e-dil-satāñ ke
fusūn-e-chāra-garī se guzrā mohabbatoñ kā payām kahnā

dil ko kyā yaar ke paikān liye baiThe haiñ
sāhab-e-ḳhāna ko mehmān liye baiThe haiñ

dil-e-pur-dāġh se bahlāte haiñ jī ko us bin
ham ye pahlū meñ gulistān liye baiThe haiñ

dast-e-qātil ke liye hoñToñ pe ab bhī marhabā
ḳhūn-e-ahl-e-dil kī ḳhātir sīna-e-mātam kahāñ

dāman-e-dil meñ sameTe haiñ abhī tūfāñ ka.ī
sail-e-ashk-o-nāla-e-ġham ho ga.e haiñ kam kahāñ

dil dhaḌaktā hai har ik aahaT pe ahl-e-hijr kā
jānte haiñ vo ki aa.egā koī is dam kahāñ

hai ḳhushī bhī ajiib shai lekin
ġham baḌe dil-pazīr hote haiñ

uljhā dil-e-sitam-zada zulf-e-butāñ se aaj
nāzil huī balā mire sar par kahāñ se aaj

ye kah rahe the kal āvārgān-e-kūcha-e-yār
adā.eñ aaj bhī us kī haiñ dil-navāz bahut

shab-e-siyah meñ bhalā kaun aane vaalā hai
koī nahīñ dil-e-ḳhāna-ḳharāb koī nahīñ

shab-e-firāq kuchh is tarah mutma.in huuñ 'ziyā'
ki jaise dīda-o-dil par azaab koī nahīñ